Эпир малашлӑха суйларӑмӑр

Раҫҫей Федерацийӗнче ҫак суйлав саккӑрмӗш хут иртрӗ.

Мартăн 15, 16, 17-мӗшӗнче ҫӗршывӑн 89 регионӗнче 94 пин ытла суйлав участокӗ ӗҫлерӗ. Тутарстанра пурӑнакансем, общественность, ҫав шутра Çӗпрел ҫыннисем те, Президент суйлавне хастар хутшӑнчӗç.
Виҫӗ кун хушшинче Ҫӗпрел районӗнче 36 территорири суйлав участокӗ суйлавҫӑсене йышӑнчӗ. 

Палӑртса хӑвармалла, ҫак кунсенче суйлав участокӗсенче хӑйне евӗр ӑшӑ атмосфера хуҫаланнӑ.
Сӑмахран, 1363 номерлӗ Кивӗ Ишлӗ суйлав участокне, чи малтан, нумай ҫул доярка пулса ӗҫленӗ Гульфания Исхакова килчӗ.

— Эпир, ял ҫыннисем, ӗҫе ир-ирех туса хума хӑнӑхнӑ. Суйлавсенчен нихҫан та юлни пулман. Ку ҫулхи уйрăмах пӗлтерӗшлӗ, — терӗ вӑл.

Район центрӗнчи 1338 номерлӗ суйлав участокӗнче пурӑнакансем суйлавăн пӗрремӗш кунӗнчех черет тăрса хӑйсен сассине пачӗç. Вӗсен хушшинче общество пурнӑҫне хастар хутшӑнакансем, организацисен, предприятисен ӗҫченӗсем, ӗҫ ветеранӗсем те пулчӗç. Саккӑрмӗш теҫеткене ваклакан Абдулхарис Алимов суйлав участокне яланах чи малтан килекенсенчен пӗри.

— Пурнӑҫăмăр питӗ лайӑх, малашне те ҫаплах пултӑр тесе суйлава килтӗм эпӗ, — тет вӑл.
Сӑнавсем те, ҫавӑн пекех, суйлав участокӗсене 90 тата унран та аслăрах çулсенчисем хӑйсем килсе сасăланине кӑтартаҫҫӗ. Сывлӑх енӗпе килме майӗсем пулманнисем патне суйлав участокӗсен представителӗсем кайрӗç. Çӗнӗ-Шӑхаль ялӗнче пурӑнакан 97 ҫулти Леонид Куракин суйлава хăех килчӗ.

Район пуҫлӑхӗ Марат Гафаров, Тутарстанри Патшалӑх Совечӗн депутачӗсем Ринат Гайзатуллин, патшалӑх пурлӑхне тытса пырас енӗпе Федераци агентствин Тутарстан Республикипе Ульяновск облаҫӗнчи регионсен хушшинчи территорири управленийӗн ертӳҫи Альберт Хайрутдинов ҫак кунсенче суйлав участокӗсенче пулса, халӑхăн кӑмӑл-туйӑмӗпе паллашса çӳрерӗç, участоксенчи условисемпе интересленчӗç. Суйлав кунӗсенче çуралнă кунӗн уявӗсем тӳрӗ килнӗ суйлав участокӗсен представителӗсене те саламлама манмарӗç.

— Президент суйлавӗ — пирӗн халӑха тата ытларах пӗрлештерекен политика пулăмӗ. Суйлавҫӑсем ҫемйисемпе участоксене килни те савӑнтарать. Аслă çулсенчисем ҫамрӑксемшӗн тӗслӗх пулса тӑраҫҫӗ, — терӗ Ринат Гайзатуллин, районти суйлав мӗнле пынине хакласа, Ҫӗпрелне ӗçлӗ визитпа килнӗ вăхăтра. 

Тутарстан правительстви суйлавсене хутшӑнакан граждансем валли парнесем, кăмăллă мероприятисем йӗркелерӗ. Суйлава килнӗ кашни çынна «Эпӗ сасӑларӑм» тесе ҫырнӑ сулă пачӗҫ. Суйлав кунӗсенче сулă маршрут транспорчӗпе, тӗрлӗ спорт тата культура мероприятийӗсене тӳлевсӗр ҫӳреме май пачӗ. 

Районти кашни участокрах вӗри икерчӗпе сăйларӗç, чей ӗҫтерчӗҫ, юрӑсем парнелерӗҫ. Чи пысăк парне пулнă май, республикӑра виҫӗ «Лада Веста» автомашина вылянтарчӗç. Вӗсенчен пӗрне пирӗн ентешӗн, Тутар Паснапуç каччин Ленар Хуснутдиновăн мăшăрӗ выляса илчӗ. Вӗсем Лаишево районӗнче пурӑнаҫҫӗ.
Унсӑр пуҫне, «ТНВ» каналта" «Пӗтӗм ҫемьепе суйлатпӑр!» онлайн-телемарафон иртрӗ. Унта Тутарстанри паллӑ ҫемьесем хутшӑнчӗç.

Район пуҫлӑхӗ Марат Гафаров черетлӗ канашлура: 

— Районта суйлав кампанийӗ пысăк хатӗрлӗхпе иртрӗ. Суйлав процесӗнче çитменлӗхсем, йӗркене пӑснисем палăрман, — терӗ суйлавсене йӗркелекенсене, ҫак кунсенче ӗҫленӗ, политикӑллӑ пулăмран айккинче юлман кашнинех тав турӗ.