«Единая Россия» партийӗн призӗсемшӗн пилӗк команда ăмăртрӗ

Район центрӗнчи «Алтын» универсаллă спорт залӗнче арҫынсен командисем хушшинче волейбол енӗпе уҫӑ район турнирӗ иртрӗ. Унта хутшӑнма районти шкулсен, организацисен тата предприятисен командисене чӗннӗччӗ.

Спортсменсене район пуҫлӑхӗн çумӗ Алексей Ярухин, ҫамрӑксен ӗҫӗсем, спорт тата туризм пайӗн начальникӗ Руслан Вильданов саламларӗҫ.

Халӑх пӗрлӗхӗн кунӗпе тата спорт уявӗпе саламланӑ май, район пуҫлӑхӗн ҫумӗ Алексей Ярухин уяв календарьте уйрӑм пӗлтерӗшлӗ пулнине палӑртрӗ.

— Тӑван çӗршывшӑн, унӑн иртни тата хальхи пурнӑҫӗшӗн мăнаçланни, унӑн телейлӗ пуласлӑхне ӗненни — вăл ҫынсене яланах пӗрлештерет, вӗсене пӗр халӑх туса тӑрать. Районăмăр — нумай нациллӗ. Районти пур халӑхсем те килӗштерсе, туслă пурӑнаҫҫӗ. Пурне те сывлӑх, ҫӑмӑл ҫӗнтерӳсем, ăнăçусем сунатӑп, — терӗ Алексей Ярухин спорт-сменсене.

Ӑмӑртусем кунӗпех пычӗç, командӑсенче питӗ вӑйлӑ вӑйçăсем пухăннăччӗ. Ӑмӑртӑва 5 команда хутшӑнчӗ. Командӑсем пурте пӗр-пӗринпе ҫаврашка системӑпа вылярӗç.

Вăййа чи малтан 1 номерлӗ Кивӗ Çӗпрел вăтам тата Кивӗ Çӗпрелӗнчи нумай профильлӗ лицей командисем пуçласа ячӗç. Пуринчен ытла финалӑн вӑййисем интереслӗ пулчӗç. Малти вырӑнсемшӗн районти чи вӑйлӑ та чӑтӑмлӑ командӑсем кӗрешрӗç. 

Çивӗч вӑйӑсем хыҫҫӑн 1-мӗш вырӑна «Çӗпрел —1» команди, 2-мӗшне — «Алтын», 3-мӗшне — «Аминистраци» команди çӗнсе илчӗç. Вӗсене «Единая Россия» политика партийӗн вырӑнти уйрӑмӗн грамотисене, медалӗсене тата парнисене пачӗç.

Турнир шайӗнче ВФСК «Ӗҫе тата хутӗлеве хатӗр». мобильлӗ площадка та йӗркеленӗччӗ. 
Аса илтеретпӗр, ГТО комплексӗ «Спорт — пурнӑҫ норми» федераллă проекта кӗрекен «Демографи» наци проекчӗн шайӗнче пурнӑҫланать.