Çуралнӑ кун тӗлне пысӑк парне

Куршанкă-Шӑхаль ялӗнче пурӑнакан Николай Афанасьев хӑйӗн юбилей кунне савăнăçлă куҫҫульпе кӗтсе илчӗ. Юбилей кунӗнче чи пысăк парне — пӗртен-пӗр ывӑлӗ ятарлӑ ҫар операцийӗн зонинчен отпуска килсе çитрӗ.

Юбилярăн ывăлне иртнӗ кӗркунне уйрӑм мобилизаци шайӗнче Тӑван çӗршыв умӗнчи ҫар тивӗҫне пурнӑҫлама чӗнтернӗччӗ. Ҫавӑнтанпа вӑл тӑван килӗнче, ҫывӑх çыннисен çумӗнче пулман. Вӑл хӑй кӗске вӑхӑтлӑха отпуска таврӑнассине никама та пӗлтермесӗр, парне тума шутланă. «Кунран та пысăк парне пулма пултараймасть», — тесе пӗлтерчӗ хăйӗн туйăмӗсем ҫинчен Николай Васильевич.

Ял ҫыннине 75 ҫулхи юбилей ячӗпе саламлама Ҫӗпрел районӗн пуҫлӑхӗн çумӗ Алексей Ярухин та килчӗ. Вӑл юбиляра район пуҫлӑхӗн ячӗпе саламлӑ ҫыру, район йӗркеленнӗренпе 90 ҫул çитнӗ ятпа медаль тата парне пачӗ. Сывлӑх, ҫемье тăнăçлăхӗ, телейлӗ ватлӑх сунчӗ.

Николай Афанасьев Куршанкă-Шăхаль ялӗнче ҫуралса ӳснӗ. Хурăнвар-Шăхаль вӑтам шкулӗнчен вӗренсе тухнӑ. Шкулта вӑл лайăх вӗренекенсенчен пӗри пулать, тӗрлӗ мероприятисенче, уйрӑмах спорт вăййисенче хастар хутшӑнать. Футбол енӗпе малти вырӑнсене пӗрре ҫеҫ мар йышӑннӑ Хурăнвар-Шăхаль вӑтам шкулӗн сборнӑй команда составӗнче пулать. 

— Манӑн спортсмен пулас ӗмӗтӗм те пурччӗ. Аннене чирлӗ асаннене пӑхма пулăшакан кирлӗ пулнăран, шел, май килмерӗ, — тесе аса илчӗ юбиляр.

Ҫемьери лару-тӑрӑва пула ăна пӗлӳ илме пӳрмен. Пӗтӗм пурнӑҫне тӑван ялне халаллать. Бригадир пулса ӗçлет. Унӑн ӗҫ стажӗ те тӑватӑ теçеткерен иртсе кайнă. 

1975 ҫулта Николай Васильевич хӑйӗн ялӗнчи Лидия Васильевнапа çемье çавăрать. Телейлӗ ҫемьере виҫӗ ача (икӗ хӗр тата пӗр ывӑл) çут тӗнчене килеççӗ. Хальхи вăхăтра Афанасьевсен 6 мӑнук тата 2 кӗçӗн мӑнук пур. Паян юбиляр тивӗҫлӗ канура.