Чашкинсене санаторие кайма путевка пачӗç

Пӑвапа Ҫӗпрел районӗсен ҫар комиссарӗ Радик Тухфатуллин ятарлă çар операци вӑхӑтӗнче пуçне хунă Михаил Чашкинӑн ашшӗ-амăшӗпе тӗл пулчӗ.

Надежда Петровнӑпа Юрий Михайлович тӗлпулăва район администрацине килчӗҫ. Вӗсене унта «Сосновый бор» санаторине путевка пачӗç (сăн ӳкерчӗкре).

Çар комиссарӗ Радик Тухфатуллин Чашкинсене паттăр ывӑл ӳстернӗшӗн тав турӗ. «Вӑрҫӑ ҫухатусӑр пулмасть. Сирӗн ывӑлӑр ятарлă ҫар операцийӗнче хӑйне чӑн-чӑн Герой пек кӑтартрӗ, хӑйӗн ҫар тивӗҫне чыслӑн пурнӑҫларӗ. Унӑн ҫутӑ сăнарӗ пирӗн кашнийӗн чӗринчех ӗмӗрлӗхех сыхланса юлӗ.  Эпир сире яланах пулӑшма хатӗр, – терӗ вӑл.

Çар комиссарӗ каланӑ тӑрӑх, ятарлӑ ҫар операцийӗнче вилнисен ашшӗ-амӑшӗсене санаторисенче сиплеме сертификатсем пама пуçларӗç. «Санаторисене кайма путевкӑсене Тутарстанăн ҫар комиссарӗ Сергей Погодин йышӑнăвӗпе параҫҫӗ», – тет Радик Тухфатуллин.

Кӗҫӗн сержант Михаил Юрьевич Чашкин, Чăваш Çӗпрел ялӗнче ҫуралса ӳссе, Кивӗ Çӗпрел ялӗнче пурӑнать. Ульяновск облаҫӗнче контрактпа ҫар службине каять. Ятарлă ҫар операци вăхăтӗнче ҫар тивӗҫне пурнӑҫланӑ чухне, хăюлăх тата паттăрлăх кăтарса, пирӗн ентешӗмӗр пуç хурать. Кӑҫалхи майӑн 29-мӗшӗнче ӑна Чăваш Çӗпрел ялӗнче пытарчӗç. Михаил Чашкин вилнӗ хыççăн, РФ Президенчӗн Указӗпе килӗшӳллӗн, Паттӑрлӑх орденӗпе парнеленчӗ.

Тӗлпулу хыҫҫӑн ҫар комиссарӗ Радик Тухфатуллин 1 номерлӗ Кивӗ Çӗпрел вăтам шкулӗн актсен залӗнче вӗренекенсемпе «Хастарлӑх урокӗ» те ирттерчӗ.