Аслӑ Ҫӗнтерӳ – куççуль, савăнăç, Тӑван çӗршыва юратнипе çӗнсе илнин уявӗ!

Чун-чӗресенче мӑнаçлăх тата хурлăх туйӑмӗсене пӗрлештерсе тӑракан  Майăн 9-мӗшӗ – вӑл аслӑ уяв кӑна мар, паттӑрлӑх тӗслӗхӗ кăтартса, хӑйсене шеллемесӗр, ҫухатусен хакӗпе çӗнтерӗве çӗнсе илнисене асра тытмалли кун та. 1945 ҫулхи май уйӑхӗ пирӗнтен 78 ҫул аякра, анчах та вӑхӑт совет халӑхӗн виҫесӗр паттӑрлӑхӗн пӗлтерӗшне вӑйлатать кӑна. 

Çӗршывăмăрăн ирӗклӗхӗ пысӑк ҫухатусен хакӗпе ҫӗнсе илӗнчӗ.  Ҫӗпрел районӗнчен фронта илнӗ 14000 ҫынран 7000 яхӑнăшӗ ҫапӑҫу хирӗнче выртса юлнă е хыпарсӑр ҫухалнӑ. Хальхи вӑхӑтра, питӗ шел, Çӗнтерӳпе ырă-сывă таврӑннă район çыннисем те тата 1941-1945 ҫулсенче ҫар службинче пулнисем те юлмарӗç ӗнтӗ. Пурӗ те 129 тыл ӗҫченӗ, мăшăрӗсем вӑрҫӑра вилнисен 39 тӑлӑх арӑмӗ ҫеҫ пурӑнаççӗ.  Вӗсем те – Çӗнтерӗве пысӑк тӳпе хывнӑ ӑру представителӗсем. Пирӗн пысӑк мӑнаҫлӑх – 6 ентеше Совет Союзӗн Геройӗ ятне пани, 2 ентешӗмӗр Мухтав Орденӗсен тулли кавалерӗсем пулса тӑни.

Эпир пурте Тӑван çӗршывӑн Аслӑ вӑрҫине хутшӑнакансен, тыл ӗҫченӗсен, вӑрҫӑ ачисен виҫесӗр паттӑрлӑхӗ умӗнче пуҫ таятпӑр, пулас ӑрусене мирлӗ пурнӑҫ парнеленӗшӗн вӗҫӗмсӗр тав тӑватпӑр. Вӑрҫӑ хыҫҫӑнхи йывӑр ҫулсенче çӗршыва хăвăрь хушăра, ял хуҫалӑхне ура çине тăратнă, экономикӑна ҫирӗплетнӗ ăрăвăн тăрăшуллă ӗçне каласа ăнлантарма пулмасть – çакă вилӗмсӗр!

Эпир фронтра тата тылра ҫӗршывăмăрăн ирӗклӗхӗшӗн пӗр хӗрхенмесӗр ҫапӑҫнӑ, ҫапӑҫу хирӗсенче выртса юлнă паттăрсем çинчен ҫутӑ асаилӳсене упраса хӑварса, ҫар тата ӗç паттăрлăхӗн тӗслӗхӗсене кӑтартнă ветерансене хисеплесе пурăнма тивӗçлӗ. Мӗн чухлӗ вăхăт иртсен те, Совет ҫарӗсем фашизма аркатса тӑкнӑ ҫулсене эпир кирек хӑҫан та асра тытăпӑр. Ҫак кун эпир хамӑрӑн ачасемпе мӑнуксен мирлӗ пуласлӑхӗшӗн никама пӑхӑнманлӑха ҫӗнсе илнӗ ҫӗнтерӳҫӗсен ӑрӑвне чыслатпӑр.

Ҫӗнтерӳ савӑнӑҫӗпе астăвăм пирӗн чӗресене пӗрлештертӗр! Пурне те ҫирӗп сывлӑх, вӑрӑм ӗмӗр, уяр тӳпе сунатӑп!

Марат Гафаров, Ҫӗпрел муниципаллă районӗн пуҫлӑхӗ.