Анне пулнипе эпӗ телейлӗ!

Пилӗк ачана пурнӑҫ парнеленӗ Фания Адизяновна Каримуллина «Ача амӑш мухтавӗ» медале тивӗçнӗ. 
Фания Адизяновна Шланка ялӗнче пурӑнать. Хăй те пысăк çемьере, 7 ачаллă, Адизянпа Лилия Аглиулловна çемйинче, ултăмӗш ача пулса, çут тӗнчене килнӗ. Ашшӗпе амӑшӗн тӗслӗхӗнче ачасем мӗн пӗчӗкренех ӗҫпе пиçӗхсе ӳснӗ. Аслисем кӗҫӗннисене: шăллӗсемпе йӑмӑкӗсене пӑхма пулӑшнӑ. 

Ялти вӑтам шкултан вӗренсе тухсан, Фания пӗр ҫуллӑха ялта юлса, колхоз ферминче ӗне сунă хыççăн, Ульяновск хулине кайса поварсем хатӗрлекен училищӗре пӗлӳ илет. Унтан хулара ӗҫе вырнаҫать. Пӗр ял каччипе Айратпа çемье çавăрать. Мăшăрӗ Айрат та Ульяновск хулинче шофер пулса ӗҫлет. Çамрӑксем хулара темиҫе ҫул пурӑннӑ хыҫҫӑн, тӗп никӗсе упраса хӑваракансем пулнă май, яла таврăнма шутлаççӗ.

Мӑшӑрӗ яла таврӑнсан та шофер ӗçне малалла тăсать, Фания вара колхозра ӗҫлеме пуçлать. Пӗрин хыҫҫӑн тепри хӗрӗсем Эльза, Ландыш, Лейсан, Айгуль, ывӑлӗ Данил ҫуралаҫҫӗ. Тӗрлӗ ҫулсенче Фаниян фермӑра ӗне сума та, «Гострахра» агент пулса ӗҫлеме те тӳрӗ килет. Мӑшӑрӗпе пӗрле вӗсем тӗп никӗсре ҫӗнӗ ҫурт туса лартаççӗ. 

— Амӑшӗ пулассинчен, ачасене юратассинчен, вӗсен ҫитӗнӗвӗсемшӗн савӑнса пурăнассинчен ытларах пысӑк телей ҫук та пулӗ, — тет пилӗк ача амӑшӗ Фания Адизяновна.

Каримуллинсем кашни ачине тӗплӗ пӗлӳ илме, пурнӑҫра хӑйсен вырӑнне тупма пулӑшаççӗ. Паянхи кун хӗрӗ Эльза Камчаткӑра пурӑнать, вырӑнти больницӑсенчен пӗринче ӗҫлет, иккӗмӗшӗ Ландыш — Магаданра, фармацевт, Лейсан — Хусан хулинче юрист профессине алла илет, Айгуль — Матак вӑтам шкулӗнче пӗлӳ илет 11 класра, ывӑлӗ Данил 6 класра вӗренет. 

— Пилӗк ача ӳстерме йывӑр пуль, — тетӗп эпӗ. — Ҫук, нумай ачаллӑ ҫемьен нимӗнле йывӑрлӑх та ҫук. Айрат та вӗт çемьере 6 ачаран чи кӗҫӗнни пулса ӳснӗ. Пирӗн иксӗмӗрӗн те пӗртăвансем нумай пулнăран, эпир хамӑр ачасене те ҫавнах сунтăмăр, — ăшшăн кулса калаçрӗ пилӗк ача амăшӗ. 

Аякра пурӑнаҫҫӗ пулин те, хӗрӗсем час-часах килне килсе çӳреççӗ иккен. Ачасем пӗрле пухӑнсан, пӳрт кӗрлесе тăрать. 5 ҫулти мӑнукӗ Али вара кукашшшӗпе кукамăшӗн пурнӑҫне тата интереслӗрех тӑвать.
Иртнӗ çул Фания «Ача амӑш мухтавӗ» медальпе наградăланнă.

— Тавтапуҫ правительствӑна, районăн ертӳçисене, Хусана, Кремле чӗнсе илсе, парнесем, чечексем пани пире питӗ кӑмӑллӑ пулчӗ. Чечексемпе парнесене Тутарстан Республикин Раисӗн Рустам Миннихановăн аллинчен илнипе те мăнаçланатпӑр, — тет Фания Каримуллина.