Акатуй уявӗнче наци кӗввисем янӑрарӗҫ

Çак уява Упи ялӗнче ирттересси йӑлана кӗчӗ. Кунта ятарлӑ Акатуй лаптăкӗ туса хунă, тавралӑха илемлетнӗ, уявлама, туянма суту-илӳ условийӗсем йӗркеленӗ. Уявăн лаптăкӗ ял варринче вырнаçни кашнийӗншӗн хăтлă.

Акатуй ирттерес кун, уяв пуçланас умӗн, витререн тăкнă пек ҫумӑр ҫуса иртрӗ. Анчах та çакă мероприятие ирттерме кансӗрлемерӗ. Тахҫантанпа кӗтнӗ ҫумӑра уявра пулнисем пурте хавасланса йышӑнчӗҫ, никам та лаптăкран кайма васкамарӗ. Кӗтмен ҫӗртен хӗвелӗ те тухрӗ, уяв хӑйӗн черечӗпе малалла пычӗ.
Акатуй уявӗ пуҫланас умӗн, район пуҫлӑхӗ Марат Гафаров хӑнасемпе пӗрле Упи ялӗнчи обелиск умне Тăван çӗршывăн Аслă вӑрҫинче вилнисене тата ун хыççăнхи çар юхăмӗсенче Тӑван çӗршыв умӗнчи тивӗҫе чыслӑн пурнӑҫланӑ ҫынсене асӑнса, чечексем хучӗҫ. Кунтах, çар юхăмӗн ветеранӗсене, волонтерсене, «Ятарлӑ ҫар операцине пулӑшнӑшӑн» медальсем парса чысламалли мероприяти иртрӗ. Ҫавӑн пекех Алексей Ярухина, Олег Кузнецова, Юрий Петухова гуманитари пулӑшӑвне йӗркелеме пулӑшнӑшӑн Тав ҫырӑвӗсем пачӗҫ.

Акатуй лаптăкӗнче хӑнасене чӑваш халӑхӗн «Хӗлхем», «Çӗпрел» фольклор ансамблӗ кӗтсе илчӗç.
Наци йӑли-йӗрки евӗр: Турăран мирлӗ те ырӑ кунсем, тырӑ тухăçлă пултăр тесе ыйтса, йăла-йӗркесем пурнăçланчӗç.

Уяв ячӗпе Ҫӗпрел районӗн пуҫлӑхӗ Марат Гафаров, Раççей Федерацийӗн правительствин культура енӗпе премийӗн лауреачӗ, ТР Обществăлла палатин членӗ, Тутарстан Республикипе Крым Республикин тава тивӗҫлӗ искусство деятелӗ, «Сосвездие — Йолдызлык» тата «Наше время — Безнен заман» фестивалӗн инициаторӗ Дмитрий Туманов, Шăмăршă тата Красноармеейски муниципаллă пӗрлӗхӗсен администрацийӗсен ертӳҫисем Сергей Галкинпа Павел Семенов, республикӑри «Сувар» хаҫатӑн тӗп редакторӗ Ирина Трифонова, ТР Чӑваш хӗрарӑмӗсен Союзӗн ертӳçи, ТР чăваш наципе культура автономийӗн Совечӗн членӗ Сильвия Чаркина, запасри подполковник Владимир Ярухин, районти Чӑваш наципе культура центрӗн ертӳçи Алексей Ярухин. Ырă сунăмӗсене пӗлтерчӗç. 

— Ку пирӗн районта икӗ наци: тутар тата чӑваш халăхӗн представителӗсем килӗштерсе пурӑннине пӗлтерет. Малашне те пирӗн наци традицийӗсем пурӑнччӑр, пирӗн уявсем халăхсене пӗрлештерсе кӗрлесе иртчӗр, çӗршывăмăр тăнăç пултăр, — терӗ район пуҫлӑхӗ Марат Гафаров, уява уҫса.

Марат Гафаров, çаплах, паян Тӑван çӗршыв хуралӗнче тӑракан каччăсен паттӑрлӑхне палӑртса иртрӗ, лаптăк варрине чӗнсе кăларса, вӗсене тав турӗ, парнесем пачӗ. 

Уяв вӑхӑтӗнче патшалӑх наградисене, район пуҫлӑхӗн Тав ҫырӑвӗсене, «Ҫӗпрел районне йӗркеленӗренпе 90 ҫул» юбилей медалӗсене, Тутарстан халӑхӗсен Ассамблейин Тав çырăвӗсене, ТР чӑваш наципе культура автономийӗн Хисеп ҫграмотисене, «ТАТМЕДИА» акционерла обществăн тата «Сувар» хаҫат редакцийӗн Тав ҫырӑвӗсене, ТР Чӑваш хӗрарӑмӗсен Союзӗн тата ытти нумай наградӑсем пачӗҫ.

Алешкин-Саплӑк ялӗн Культура çурчӗн заведующийӗ Наталия Клементьева, Чӑваш Паснапуç пуҫламӑш шкул-ача сачӗн директорӗ Галина Кудряшова, библиотека ӗҫӗн ветеранӗ Зоя Кузнецова Валерий Чебановăн премине тивӗҫлӗ пулчӗç. 

Уявра ял тăрăхӗсен пуҫлӑхӗсен вӑйӗпе йӗркеленӗ чӑвашсен наци кил-ҫурчӗсем ӗҫлерӗҫ. Унта хӑнасене наци апачӗ сӗнчӗç, мастер-классем ирттерчӗç. 

Уявра «Уяв пики» пултарулӑх конкурсӗнче наци костюмӗсем тӑхӑннӑ чӑваш хӗрӗсем сцена çине тухса, юрласа-ташласа панине курма май пулчӗ. Пӗтӗмлетӳсемпе, кашнинех Дипломсемпе парнесем пачӗҫ. 

Торжествăлла пай хыççăн спорт ӑмӑртӑвӗсем, вӑйӑсем пуҫланчӗҫ. Кашниех хӑйӗн вӑйне кӗрешӳре, канат туртассинче, армспортра, шӑчӑ тӑрӑх хӑпарса тата ытти нумай вӑйӑсенче сăнаса пӑхма пултарчӗç.
«Акатуй» уявӗ ӗмӗр-ӗмӗрех хӑйӗн ирӗклӗ кӗрешӗвӗпе чапа тухнӑ.

Кăçалхи çулăн паттăрӗсем: 

35 кг виҫе йывăрăшӗнче: 1 вырӑна — Александр Чернов (Алешкин-Саплăк), 2 вырӑна — Степан Григорьев (Хурăнвар-Шӑхаль), 3 вырӑна — Павел Маштаков (Кивӗ Улхаш); 40 кг виçе йывӑрӑшӗнче: 1 вырӑна — Егор Юдин (Алешкин-Саплăк), 2 вырӑна — Тимофей Огурцов (Çӗнӗ Йӗлмел), 3 вырӑна — Николай Акимов (Матак); 50 кг виҫе йывăрăшӗнче: 1 вырӑна — Николай Акимов (Матак), 2 вырӑна — Кирилл Юдин (Алешкин-Саплăк), 3 вырӑн — Роман Романов (Алешкин-Саплăк); 60 кг виçе йывӑрӑшӗнче: 1 вырӑна — Александр Акимов (Матак), 2 вырăна — Никита Федоров (Алешкин-Саплăк), 3 вырăна — Кирилл Чата (Кивӗ Улхаш); 70 кг таран виçе йывăрăшӗнче: 1 вырӑна — Павел Марков (Çӗнӗ Йӗлмел), 2 вырӑна — Валерий Мендеев (Çӗнӗ Йӗлмел), 3 вырӑна — Егор Михайлов (Упи); 80 кг виçе йывăрăшӗнче: 1 вырӑна — Вадим Чернов (Матак), 2 вырӑн — Александр Ефимов (Çӗнӗ Йӗлмел), 3 вырӑна — Илья Чемуков (Кивӗ Улхаш); 80 кг ытларах виçе йывăрăшӗнче: 1 вырӑна — Алексей Шингарев (Матак), 2 вырӑна — Николай Цыфаркин (Упи) çӗнсе илчӗç.
Акатуйăн абсолютлă паттӑрӗ Алексей Шингарев (Матак ялӗ) пулса тӑчӗ. 
Уявра тӗрлӗ суту-илӳ речӗсем ӗҫлерӗç. Столовăйсенче чей вӗрерӗ, шашлык пиçрӗ, чуччусем, ачасем валли вăйăсем йӗркелерӗç.

Наци кӗвви-юррисене Чӑваш патшалӑх юрӑпа ташӑ академи ансамблӗ, районти художествӑлла тата пултарулӑх коллективӗсем, чӑваш эстрада артисчӗсем, ҫамрӑк ҫӑлтӑрсем — аппăшӗпе йăмăкӗ Чаркинасем парнелерӗç. Вӗсен ҫумне хутшӑнса, юрларӗ-ташларӗ. 

Пурте пĕрле пухăнса, çапла, Акатуй уявне анлăн та шавлă ирттерни пурнăçра та, ĕçре те пулăшать. Халăх йăли-йĕркине несĕлсемшĕн упрасси, ăна аталантарасси — тĕп тĕллев. Çак кун ял тăрăхĕнче пурăнакансемшĕн кăна мар, хăнасемшĕн те, чăннипех, пысăк уяв пулчĕ.