Ачасем валли вылямалли лаптăксем

 Ӗлӗк хула тӑрӑхӗнче ҫеҫ курма пулнӑ ачасен лаптăкӗсем халӗ ял тӑрӑхӗнче те курӑнма пуҫларӗҫ. Юнкун ҫавӑн пекех лаптăк Кивӗ Ҫӗпрел ялӗнчи храмăн территорийӗнче уҫӑлчӗ. Объекта Президент Гранчӗсен Фондне тӗпе хурса тунӑ. Проекта Сергий Радонежский храмӗн настоятелӗпе Павел Пурловпа пӗрле ӗçленӗ.

Ачасен лаптăкне чаплӑн уҫмалли мероприятие православи тӗнне ӗненекенсен çвятуйне Николай Чудотвореца халалласа ирттерчӗç.  Пурнӑҫри йывӑр лару-тӑрура пулнисене мӗн авалтанпах çвятуй Николай пулӑшнӑ, хӗлле, Раштав уявӗ умӗн, ачасене парнесем панӑ. Ҫакӑн ҫинчен храмăн настоятелӗ Павел Пурлов каласа пачӗ.

– Манӑн кунта ачасем валли канмалли вырӑн тӑвас ӗмӗт тахҫанах пулнӑ, акӑ вӑл пурнӑҫланчӗ, савăнăр, канăр. Лаптăк пурне те савӑнӑҫ кӳтӗр, ача-пӑчан савӑнӑҫлӑ сассипе тулса тăтăр. Ачасем – пирӗн пуласлӑх, – терӗ вӑл.

Лаптăкра таканккасем, шуса анмаллисем, спортпа туслашма оборудованисем вырнаҫнӑ. Ачасен кăмăлне кайнă çак лаптăка уçнă май мероприятие пухӑннисене Ӗç тăвакан комитетăн ертӳҫин ҫумӗ Ильмир Измайлов саламларӗ.

– Ҫитес ҫулсенче лаптăка оборудованилесси малалла тӑсӑлӗ. Хальлӗхе пӗрремӗш тапхӑрти ӗҫсене ҫеҫ пурнӑҫланӑ.  Ҫаксене пурне те пулас ӑрушӑн тӑрӑшса тӑваҫҫӗ. Уяв ячӗпе! – терӗ Ильмир Измайлов.

Ачасемпе вӗсен ашшӗ-амӑшӗсем валли Хӗл Мучи тата Юр пике, юмахри геройсем хутшăннипе концерт номерӗсем, кăмăллă вӑйӑсем хатӗрленӗччӗ. Ачасем савӑнсах вылярӗç, вӗри чей ӗҫрӗç, тутлӑ апатпа сăйланчӗç.

Марина Николаева:

– Эпир ҫав чиркӳ ҫывӑхӗнчи урамра пурӑнатпӑр. Ялтан куҫса килтӗмӗр. Чӑнах та, ачасем валли интересленмелли объектсем район центрӗнче питӗ нумай. Пирӗн пӗчӗк ачасене ку лаптăк та питӗ кирлӗччӗ. Пӗрремӗшӗнчен – ҫывӑхра, иккӗмӗшӗнчен – ку енчен  пӗчӗк ачасем нумай. Виҫҫӗмӗшӗнчен, храмăн территорийӗнче те яланах ҫутӑ, апла пулсан, каҫхине килсе ачасемпе выляма та май пур.