Яңа Элмәле авылында яшәүче Мискиннар гаиләсенә 13 саны бәхет китергән

Дөрес, бор­чулы көннәре дә аз булмый бу гаиләнең. Балалары булмый торгач, "акыллы" киңәш бирүчеләр дә күп була. Тормагыз, аерылышыгыз, янәсе. Ә алар, үҗәтләнеп, бә­хет килгәнен көтә. Бала сөю бәхете бары 20 елдан соң гына насыйп була Мискиннарга. "Бер-беребезне яраттык. Чит кешеләр әллә нинди киңәшләр бирсә дә, аерылышу турында уйлап та карамадык. Сабыр иттек. Бергә яши башлаганга 8 ел тулгач, ятим бала алырга булдык. Минем бик тә кызлы буласым килгән иде. Тик би­ләүдә яткан өч айлык малайны күргәч, баш тарта алмадык. Педагогика институтында укыган студент кыз ташлап киткән аны. Татар малае! Алып кайткач, исемен Саша дип куштык, үзебезнеке итеп сөеп яши башладык. Әйтерсең лә ул сабыйны үзем тапканмын, - дип искә ала Светлана. - Саша белән дөнья­быз түгәрәк­ләнде. Тик алда безне тагын бәхет көткән икән. 39 яшем­дә авырга уздым! Үземдә үзгә­реш­ләр сизгәч, табибка барган идем, ул миңа өч айлык көмәнем барлыгын әйтте! Сабыйны бик җиңел күтәрдем. Хәзер улыбызга 6 яшь инде".

Кызлы булу теләге ике малайлы булгач та бетми Мискиннарда. Узган ел Ульян өлкәсендә урнашкан балалар йортына барып, кыз бала сорыйлар. "Озак көттек. Ниһаять, сабыйны күрдек, ошаттык. Документлар җыя башладык. Әмма ул арада безгә дигән кызны башка гаилә алып киткән. Инде нишләргә дигәндә, безгә өч бертуган сабыйны күрсәттеләр. Ике малай һәм бер кыз. Өч яшьлек малай белән кыз - игезәкләр. Кечкенә­ләренә ике генә тулган. Ул сабыйларны ничек бер-береннән аермак кирәк? Алып кайттык үзебезгә. Аларның әле 6-7 яшьлек бер апасы белән абыйсы да булган - башка гаиләгә алып киткәннәр", - ди Светлана.

Әнә шулай итеп Мискиннар күп балалы гаиләгә әверелә. Хәзер Светлананың көне сабыйлар бе­лән мәш килеп уза. Артларыннан җыештыра, ашарларына пешерә икән. Сабыйлар бәрәңге боткасы белән кәтлит, пилмән, камыр ризыклары бик ярата, ди. "Бер тик тормыйбыз. Укырга, язарга, рәсем ясарга өйрәнәбез. Күп балалы да булдык, тик менә онык сөяргә әби-бабалары гына юк. Иртәрәк киттеләр", - ди Светлана.

Олы уллары Чүпрәледә техникумда автомеханик булырга укый. Көрәш белән мавыга икән. "Улыбызны 2019 елда армиягә алачак­лар. Бик матур егет булып үсте. Күзләр генә тимәсен! Балаларымны бертигез күрәм, алар барысы да - безнеке. Без үстердек бит, - дип сөйли Светлана. - Бала бәхе­тен биргәнгә, мин аларга әни булганга Ходаема рәхмәт укыйм".