Бәхеткә юл ярганда

Әлеге датаны ул гүзәл зат буларак каршы алса, гомер бәйрәме дә шушы көнне аның, ә быел ул юбилейлы да - Фәридә ханымга 50 яшь тула.

Райондашларыбыз Фәридә ханымны район кулланучылар җәмгыятендә эшләгән кеше, сатучы буларак белә. Әлеге хезмәте аның 1990 елдан ук башлана. Һәрвакыт игътибарлы, итагатьле, ачык йөзле булуы белән хөрмәт казана ул. Бүген дә әлеге һөнәренә тугрылыгын саклап, сатучылык эшен дәвам иттерә.

Тормыш иптәше Ваһап белән 1989 елда бәхетле гаилә корып, бер ул үстерәләр. Аны армия сафларына озатып, исән-имин каршы алалар. Бүген алар яшәүнең мәгънәсен, тормышның кадерен белеп, гомер кичерәләр.

Гомумән, тормышта куелган максатларга ирешү өчен ныклы ихтыяр көче, тырышлык, үҗәтлек кирәк. Боларның барысы да Фәридә ханымга хас сыйфатлар. Нәкъ шулар бәрабәренә үз бәхетенә юл салган да ул.