Анат Чакăра «Тӑван ен кунӗ»

 «Тӑван ен кунӗн»            уявне ирттерекен вырăнта иртенпех музыка янӑраса тăчӗ, хӑнасене кунта пултарулӑх ансамблӗ кӗтсе илчӗ. Тӗрлӗ суту-илӳ речӗсем йӗркеленӗччӗ. Ачасем валли таканккасем вырнаҫтарнӑ, вӗсем савӑнсах батутсем ҫинче сикрӗç. Олег аттен музейӗнчен курав, купӑссемпе баянсен куравӗ, карҫинккасем ӑсталас енӗпе мастер-класс              ӗҫлерӗ.

Анат Чакă ял тӑрӑхӗнче пурӑнакансене саламлама районти Ӗҫ тӑвакан комитетăн ертӳҫи Рустам Мухаметзянов, район пуҫлӑхӗн çумӗ Алексей Ярухин, ТР Чӑваш хӗрарӑмӗсен союзӗн ертӳçи Сильвия Чаркина, «Сувар» хаҫатӑн тӗп редакторӗ Ирина Трифонова, Ульяновск облаҫӗн представителӗсем тата ыттисем килнӗччӗ. Хӑнасен ятӗнчен ӑшӑ сӑмахсем нумай пулчӗҫ.

– Паян пысӑк уяв – тӑван ен кунӗ, Ял кунӗ. Паян та эпӗ пурне те ҫак чаплӑ уяв ячӗпе саламлатӑп. Енчен те çынсем хӑйсен йӑлисемпе уявӗсене манса каймасан, ялта пурӑнӗ. Яла малашне те аталанма, ҫӗнӗ ҫитӗнӳсем тума сунатӑп, кунта тăван енӗн интересӗсемшӗн тăрăшса пурнӑҫланакан пур пуҫарусенче те ăнăçусем сунатӑп, – терӗ Рустам Мухаметзянов, хӑйӗн саламлӑ сӑмахӗнче Анат Чакă ял тӑрӑхӗнче пурӑнакансене.

Вӑл, ҫак уява ирттерме пысӑк пулӑшу панӑшӑн тав туса, Олег Волкова, Владимир Токмакова район пуҫлӑхӗн Хисеп грамотисем, Борис Албутова, Ринат Айзятова тата Филорет Шарафутдинова Тав ҫырӑвӗсем пачӗ.

Уявӑн савăнăçлă пайӗнче, çаплах,  кăçал пӗрле пурăнма пуçланин юбилейӗсен датисене паллӑ тунă е паллӑ тăвакан мӑшӑрсене: Петр Терентьевичпа Нина Петровна Кузьминсене, Надежда Александровпа Владимир Александрович Абросимовсене, Мария Сергеевнапа Владимир Александрович Волковсене, Ольга Васильевнапа Леонид Васильевич Албутовсене, Нина Васильевнапа Петр Николаевич Матюшинсене, Шамсеруй Сирачевна тата Мансур Сафиуллович Алимовсене, Фируза Сайфулловпа Роберт Зайнабович Загидуллинсем, Розания Атаулловнапа Шамиль Давлетшинович Мубиновсене, Гульгена Гумаровнапа Ринат Айниятуллович Мушараповсем, Дамира Сабировнапа Адып Шакирович Еремеевсене, Минзавгар Идиятулловнапа Набиулла Афауллович Тухфатулловсене, Миннур Ибрагимовнапа Зайнаб Аляутдинович Мубиновсене, Гульзиган Хасановнапа Иршат Ибрагимович Алимбиковсене парнелерӗç.

Ҫавӑн пекех, Анат Чакă ял тӑрӑхӗнчен мобилизациленӗ каччăсен ашшӗ-амӑшӗсене те тав турӗç. Юлия Геннадьевнапа Владислав Уинтонович Ивановсене, Галина Сергеевна Волкована, Наталья Владимировнана, Римма Ирфановна Бадамшинана, Светлана Сергеевнапа Валерий Николаевич Огурцовсене, Мария Петровнапа Анатолий Николаевич Сергеевсене, Зоя Васильевна Хмелевана, Лилия Джамильевнапа Джалиль Жемилевич Мурасовсене, Гульсина Ханафиевнапа Ильгизар Зайнуллович Хамзинана асăнмалăх парнесем пачӗç.

Анат Чакă ял тӑрӑхӗн пуҫлӑхӗ Олег Албутов спонсорсене уяв ячӗпе саламларӗ, вӗсене Хисеп хучӗсемпе чысларӗ.

Уявра хутшӑнакансене Анат Чакă ялӗнчи Михаил Архангел храмӗн настоятелӗ Протоиерей Олег атте, Анат Чакă ял совечӗн ертӳçи Николай Кузьмин, ТР Чӑваш хӗрарӑмӗсен союзӗн ертӳçи Сильвия Чаркина тата «Сувар» хаҫатӑн тӗп редакторӗ Ирина Трифонова саламларӗҫ. Сильвия Чаркина нумай ачаллӑ Клавдия Шингаревана (11 ача), Елена Мердюкована (9 ача), Анат Чакă вăтам шкулӗнчи пуҫламӑш классене вӗретекен Валентина Иванована Тав ҫырӑвӗсемпе парнесем пачӗ. Олег атте, Анна Биктирякова тата Василий Кадушкин «Сувар» хаҫатӑн Тав ҫырӑвӗсене тивӗçрӗç.

Парнесем панă хыҫҫӑн спорт ӑмӑртӑвӗсем, вӑйӑсем пуҫланчӗҫ. Вӑй тата хăвăртлăх, кире пуканӗ йăтасси пек тата ытти спор ăмăртăвӗсем йӗркеленӗччӗ.

Уяв «Кӗрешӳ» тата лашасен чупăвӗсӗр те иртмерӗ. Тытӑҫу мӗнле пынине, лашасен ăмăртăвне пурте интересленсе сӑнарӗç.

45 килограма яхăн виçе категорийӗнче: 1 вырăна Динар Мифтахутдинов (Кивӗ Кахăрлă), 2 вырӑна – Егор Юдин (Алешкин-Саплăк), 3 вырӑна – Николай Мускатинов (Аслă Аксу) йышӑнчӗç.

60 килограма çитичченхи  виçе категорийӗнче: 1 вырӑна – Тагир Калимуллин (Тутар Паснапуç), 2 вырӑна – Кирилл Юдин (Алешкин-Саплӑк), 3 вырӑна – Артур Хакимов (Анат Чакă) çӗнсе илчӗç.

60 килограмран ытларах виçе категорийӗнче: 1 вырӑна – Разиль Фатхуллин (Кивӗ Кахăрлă), 2 вырӑна – Никита Федотов (Алешкин-Саплăк).

75 килограма çитичченхи виҫе категорийӗнче: 1 вырӑна – Ильназ Хузиев (Кивӗ Кахăрлă), 2 вырӑна – Динар Иматдинов (Кивӗ Кахăрлă).

75 килограмран ытларах виҫе категорийӗнче: 1 вырӑна – Айрат Идрисов (Кивӗ Кахăрлă), 2 вырӑна – Максим Петухов (Кивӗ Ҫӗпрел), 3 вырӑна – Олег Токмаков (Анат Чакă). Айрат Идрисов абсолютлӑ паттӑр титулӗпе така хуҫи пулса тӑчӗ.

Лашасен чупăвӗн ăмӑртăвӗсенче 1-мӗш вырӑна Сергей Ишмуков (Хулаçырми), 2 вырӑна – Егор Биктиряков (АгроТрансПорт) йышӑнчӗ.

Валентина              

Захарова-Игнатьева:

– Уява питӗ лайӑх йӗркеленӗ, пире питӗ килӗшрӗ. Эпир паян ирхине, тӑватӑ йӑмӑк пӗрле пухӑнса, килтӗмӗр. Эпӗ Ульяновск хулинче пурӑнатӑп. Пӗлтӗр те эпир уява килнӗччӗ, питӗ савӑнӑҫлӑ пулчӗ. Кунта эпир кӳршӗсемпе, пӗр класра вӗреннисемпе, тукссемпе тӗл пултӑмӑр. Ҫак уява ирттерме моральпе финанс пулӑшӑвне панисене пурне те тав тӑвас тетӗп.