Чүпрәледән Фирдәүсә Яфизова «Интернетка рәхмәт – 2025» бәйгесе җиңүчесе

Язмабыз героеның тарихы заманча технологияләр ярдәмендә үткәнгә– яңа тормыш, киләчәккә –өмет бүләк итә алуның ачык мисалы.

Фирдәүсә ханым лаеклы ялга чыкканнан соң,  районда фотодокументлар ясау буенча үзенә шөгыль булдыра. Бүгенге көндә ул аннан тыш, элеккеге фотосурәтләрне реставрацияләү юнәлешндә дә эшли. Моңа ул күпсанлы райондашларыбызның якыннарының элеккеге фотоларын яңартуын соравы гозерыннан соң алына. 

“Гадәттә, 9 май–Җиңү бәйрәме алдыннан “Үлемсез полк” өчен ата-бабаларының таушалып, саргаеп беткән фотоларын алып киләләр. Сынып, бөгелеп беткән фотолар, әмма алар һәр гаилә өчен кадерле, чөнки ул–якыннарының бердәнбер фотосы. “Ничек тә яңартып булмасмы”, дигән өмет белән киләләр”,-дип сөйли Фирдәүсә ханым.

Һәм ул компьютер, бүгенге заманча программаларны кулланып. Фотоларны янә җанландыра, яңа сулыш өрә.

–Еллар дәвамында мин әлеге фотоларны аерым папкага теркәп бардым.  Бүгенге көндә бу галереяда меңгә якын сугыштан кайтмаган якташыбызның фотосурәте саклана,-ди ул.

булдырылган фотосурәтләрдән ул видеофильмнар әзерли һәм аларны социаль челтәрләрдә урнаштыра. Фирдәүсә ханым булдырган архив нигезендә район музейларында стендлар төзелә. Шулай итеп виртуаль галерея чынбарыкка күчә, тере тарихка  әверелә.

Бүгенге көндә Бөек Ватан сугышында катнашкан ата-бабаларыбызның батырлыгы янә кабатлана. Шулай итеп, галереяга яңа буын–махсус хәрби операциядә катнашучылар өстәлә.

Фирдәүсә ханым аларның якыннарының, хәтта мөрәҗәгать иткәнен дә көтми, һәлак булган хәрбиләрнең фотосурәтләрен интернет киңлекләрендәге  мәгълүматлар нигезендә табып, янәдән тергезә, үзенчә “тыныч кына хисап” алып бара.  Чөнки киләчәк буын өчен аның никадәр мөһимлеген ул бик яхшы белә.

Фирдәүсә ханымның  тарихыбызга, үткәннәргә битараф булмавы пенсионерлар арасындагы компьютер белеме буенча  «Интернетка рәхмәт – 2025» Бөтенроссия конкурсында  лаеклы бәясен тапты, ул «Җиңүгә 80 ел: Геройлар турында тере хәтер» номинациясендә 3 нче урынны алды.

Шушы көннәрдә аңа Россия Социаль фонды һәм «Ростелеком» җәмгыятенең  Дипломы һәм бүләкләре тапшырылды.

Фирдәүсә ханым Яфизованың әлеге җиңүе  чыннан да интернет  киңлекләре, заманча технологияләр тирә-юньне үзгәртә алу мөмкинлеген раслый.