Ырă çынсем

Нумаях пулмасть Турхан Упи ялӗнче пурӑнакан Ирина Краснован ҫыхнӑ нускисемпе ҫапӑннӑ сӑн ӳкерчӗкне «Одноклассники» социаллӑ сетьре вырнаҫтарнӑ хыҫҫӑн нумайӑшӗ тав туса та ҫырчӗҫ.

Хальхинче эпӗ те ҫывӑхрах тӗл пулса ыйтса пӗлтӗм.

— Ирина Васильевна пӗртте ахаль лармастӑр, шав алӑ ӗҫӗпе аппаланатӑр. Ҫулталӑк пуҫламӑшӗнче пӗр парти ӑшӑ нуски ҫыхса хамӑрӑн ятарлӑ ҫар операцийӗнче тӑракан салтаксем валли гуманитари пулӑшӑвӗпе парса янӑччӗ. Халь тата ҫыхса ырӑ та пархатарлӑ ӗҫ тӑватӑр.

— Ҫапла хӑвӑртрах вӗҫлентӗрччӗ çар операцийӗ, хӳтӗлевҫӗ-салтаксем килӗсене сывӑ таврӑнччӑр. Ирхине культура ҫуртӗнче йӗркелленнӗ волонтерсен ушкӑнӗпе маскировка сетки ҫыхнӑ ҫӗрте тӑрӑшатпӑр, каҫхине кил хуҫалӑхри ӗҫсене вӗҫлесен алла йӗппе ҫӑмха тытса нуски ҫыхма ларатӑп.

Акӑ ҫак кунсенчем 50 мӑшӑр ҫӑм чӑлха-нуски ҫыхса салтаксем валли парса яма хатӗрлесе, ял хутлӑхĕн кантурне кĕртсе пачĕ. Пирӗн тӑнӑҫлӑхшӑн сыхă тӑракансен урисем ӑшӑ ҫӗрте пулччӗр тесе чун ӑшшипе ҫыхнӑскерсем. Кашни ҫӑм нускире Раҫҫей ялавӗн виҫӗ тӗсӗ сӑнланни Ҫӗнтерӳ патнелле ҫывхартма хавхалантарни курӑнать.

— Эпир ӑшӑ пӳртре ҫывӑрсан та, вӗсем тӗрлӗ условисенче, маскировка сеткисемпе витӗнсе выртнине те илтетӗн. Пиртен пӗчӗк пулӑшу пулсан та, чунӗсене ӑшӑттӑр, — терĕ Ирина Краснова.

Волонтерсем чун ăшшине парса, ҫыру шӑрҫаласа ӑшӑ нуски ӑшне чиксе ярса, часах вӗсен ҫырӑвӗсем паллӑ мар салтак патне ҫитсе, чунӗсене кӑштах та пулин ӑшӑтасса шансах тӑраҫҫӗ. Çаплах нуски ăшне салтаксем валли пылак кучченӗҫ те хурса яраççĕ. Пурне те чĕрĕ-сывă таврăнма сунаççĕ.