Вӗсем пур енчен те пултаруллă

Кивӗ Ҫӗпрел ялӗнче пурӑнакан Разиня Яфизова та иртнӗ çул «Ача амӑш мухтавӗ» медале тивӗçнӗ.

Разиняпа унӑн мăшăрӗ Ильнур иккӗшӗ те Кивӗ Чукал ялӗнче ҫуралса ӳснӗ. Вӗсем 2013 ҫулта çемье çавăрнă. Ильнур Разинян пӗрремӗш мӑшӑрланура ҫуралнӑ хӗрачисене: Рузиляна, Расимана тата Раиляна  хӑйӗн ачисене йышӑннӑ пекех йышӑнать. Кӑшт вӑхӑт иртсен, ҫемьене тата тӳллилентерсе, Ильсиняпа Айнур ҫут тӗнчене килеççӗ. Разиняпа Ильнур район центрӗнче ҫурт туянаççӗ, куҫаççӗ. Ҫемье пысӑклансан вӗсем ҫӗнӗ пӳрт тума та пуçăннă.

— Мăшăрăм нумай ачаллӑ ҫемьере ӳснӗ. Вӑл питӗ ачасене юратать. Ачасем нумаййишӗн савӑнать кăна. Эпӗ те ӳпкелешместӗп. Аслисем кӗҫӗннисене пăхрӗç. Вӗсем пӗрле, туслӑ ӳсеҫҫӗ. Пӗтӗм ӗҫе пӗрле тума тӑрӑшатпӑр, — тет Разина. 

Хальхи вăхăтра хӗрӗсенчен Рузиля районти техникумра повар-кондитер профессине алла илес тесе тăрăшать, Расима — Пӑвари медучилищӗре пӗлӳ илет, Раиля — Ульяновск хулинчи колледжра вӗренет, Ильсиня — 1 номерлӗ Кивӗ Çӗпрел вăтам шкулӗнче 4 класра вӗренет, ывӑлӗ Айнур Çӗнӗ Çӗпрелӗнчи ача сачӗ-пуҫламӑш шкулта вӗренет. 

Халӗ ҫеҫ туса лартнӑ пӳрте ку чухнехи сӑн-сӑпат кӗртессипе тăрăшаççӗ Яфизовсем. 

— Пӳрт лартнă чухне те эпир ăстасене тара тытман, пурне те хамӑр тума тӑрӑшрăмăр. «Хамӑр» тесе калатăп ӗнтӗ, тӗрӗсрех каласан, Ильнур турӗ, эпӗ ӑна ачасемпе пӗрле пулӑшрӑм, — тет кил хуҫи арӑмӗ.
— Турри телей патӑр пире. Сывлӑхран ан уйăртӑр. Ыттине вара тума пулать, — теҫҫӗ Яфизовсем.