Утă çи вăхăчӗ

Ӗлӗк ялта ятарлӑ çава çапакансем пулнӑ. Теприсем кӗреплесем тунă, вӗсен хуҫӑлнӑ шӑлӗсене тӳрлетнӗ. Ялти ватăсем, улӑха тухнӑ, утӑ пулса çитнипе ҫитменнине палăртнă. Чечек вӑррисем пӗр хут ҫӗре тăкăнсан кăна (çакă килес çул та курăка çăра пултарассишӗн кирлӗ) утă çулма тухнă халăх.  Чи хисеплӗ, опытлă çын çавипе пӗрремӗш паккуса çулнă. Утӑ ҫулас, утӑ пуҫтарас ӗçе пӗрле хӑвӑрт ӗçленӗ. Кунсем шӑрӑх, типӗ вăхăтра çулнă,  уяр çанталăкра купаласа хума тăрăшнă.

Тӗрӗс, халӗ шавласа, юрласа, çава тытса уй-хире тухакансем ҫук, алӑпа тумалли ӗҫ те иккӗмӗш вырăна куҫрӗ. Çавана бензинпа ӗçлесе тăракан косилкăсем, тракторсем улӑштарчӗҫ. Тӗллевӗ çавах юлчӗ – кирек мӗнле пулсан та, ӳснӗ утта типӗтсе, кунсем ҫумӑрланиччен купаласа хурасси.

Ялти кӳршӗре Фанияпа Нургали Хисамовсем те çакăн пек шухăш-тӗллевсемпе пурăнаççӗ çак кунсенче. Курăка  темиҫе пахчара акса ӳстереҫҫӗ, ҫу каҫиччен ик-виç хут пуҫтарса илеççӗ. «Тӑватӑ-пилӗк пуҫ мăйракаллă шултра выльӑх пур пирӗн, çак пахчасенче ӳстерни  хӗл каçарма ҫитет», – тет ҫемье пуҫлӑхӗ Нургали. «Эрне тăршшӗпе утă çулни-пуçтарни тӗлӗкре те курăнма пуçларӗ ӗнтӗ», – тесе шӳтлесе илчӗ мăшăрӗ Фания та. – Кăçал çумăрсем пулчӗç, курăк лайăх ӳсрӗ, тесе хушса та хучӗ.

Çакăн пек утă çи ӗçӗсен вăхăтӗнче ял халăхне Аббазов Сайфулла, Дамир Идрисов, Иршат Алиакберов тата ыттисем те пулăшаҫҫӗ. Малтан тракторӗсенчен косилкăсем çаклатса курăка ҫулаҫҫӗ, унтан рулонсем тăваççӗ. Çак тракторсемшӗн ялта çак кунсенче черете те тăраççӗ. «Хӑш-пӗр кунсенче апат çинчен те манатпăр. Пурин патне  те ӗлкӗрес килет, пурне те пулӑшас килет, – тет Иршат Алиакберов.

Чăн та, çу  çапла пулать ӗнтӗ вăл. Çамка, çурăм çинче тар тухиччен ӗçлесен те, кăмăллă. Сарай, вите тăррисене утă кӗртсе, пахчана купаласа хурсан, ывăннине те манать ял халăхӗ тата  вутă та хатӗрлемелле, çулла питӗ нумай ӗçсем кӗтсе тăраççӗ вӗт...