Ҫул ҫине юр тӑкма юрамасть

Иртнӗ эрнере районти Ӗç тăвакан комитет çумӗнчи административлӑ комиссийӗн ларӑвӗ пулса иртрӗ. Ӑна районти Ӗҫ тӑвакан комитетăн ертӳҫи Рустам Мухаметзянов ертсе пычӗ.

Пӗрремӗш ыйтупа ларура административлӑ правӑна пӑсни ҫинчен пӗр ӗҫе пӑхса тухрӗç. Ҫӗнӗ Ҫӗпрел ялӗнче пурӑнакан пӗр çын тӗлӗшпе протокол ҫырнӑ, вӑл хӑйӗн кил-картинчен иртсе ҫӳрекен çул çине юр кăларса тăкнă, ҫапла вара яла хӑтлӑх кӗртесси ҫинчен калакан закона пӑснӑ. Çырнă протокол енӗпе комисси членӗсем ӗҫе тӗплӗн тишкерсе тухрӗҫ, решени йышӑнчӗҫ.

Аса илтеретпӗр, яла хӑтлӑх кӗртесси ҫинчен калакан законпа пӑхса хӑварнӑ административлӑ правӑна пӑснӑшӑн чи пӗчӗк виҫе 2 пин тенкӗрен пуҫланать.