«Точка роста» центрӗнче уçă уроксем иртеççӗ

2021 ҫула – Раҫҫей Федерацийӗнче наукӑпа технологисен çулталӑкӗ тесе палăртнăччӗ. Çавна май шкулсенче тӗрлӗ мероприятисем йӗркелеççӗ

1 номерлӗ Кивӗ Ҫӗпрел вăтам шкулӗнче «Точка роста» цифрлă тата гуманитари профилӗсен пӗлӳ паракан центрӗнче уçă уроксем тата мастер-классем йӗркелерӗç.

Унта пӗлӳ паракан учрежденисен ертӳçисем, вӗрентекенсем, вӗренекенсем хутшӑнчӗҫ. Мероприятие килнӗ ҫынсем хӑйсем валли ҫӗнӗ майсем уҫса, ку чухнехи технологипе тата гуманитари ӑслӑлӑхӗсемпе паллашрӗç, ҫӗнӗ меслетсем алла илчӗç.

Районти çутӗç методисчӗ Ильнур Мавзютов палӑртса иртнӗ тăрăх, вӗренекенсем пур енӗпе те интересленеççӗ.

– Шахматпа интересленме кăмăллакан ачасен шучӗ те ӳсет, çавăн пекех, роботсем тӑвасси, тӗрлӗ проектсем тӑвас текенсем те сахал мар,  – тет вӑл.

Справка

«Точка роста» цифрӑпа гуманитари профилӗсен пӗлӳ паракан центрӗ 1 номерлӗ Кивӗ Çӗпрел вăтам шкулӗнче, ун хыççăн Чăваш Çӗпрел вăтам шкулӗнче уçăлчӗ. Кăçал вара çакăн пек центр Анат Чакă, Кивӗ Кахăрлă, Упи тата Çӗнӗ Упи шкулӗсенче те пулӗ.

Темăна малалла тăсса

Центрсене тăвасси Тутарстанра «Вӗрентӳ» наци проекчӗн «Саманари шкул» федераллă проекчӗпе пурнӑҫланать. 2019 ҫулта «Точка роста»  центрӗсем республикăн  90 ытларах шкулӗсенче йӗркеленнӗччӗ, 2020 ҫулта центрсем 42 ялти шкулта уҫӑлчӗç. Кӑҫал республикӑн 114 шкулӗнче «Точка роста» цифрлă тата гуманитари профилӗсен пӗлӳ паракан центрӗсем уçăлӗç, тесе шутлаççӗ.

Унăн хăйне евӗрлӗхӗ çакăн пек – кабинетсем вӗренекенсемпе педагогсемшӗн ку чухнехи приборсемпе инструментсемпе: квадрокоптерсемпе, пӗрремӗш медицина пулӑшӑвӗ кăтартас енӗпе мастер-классемшӗн манекенсемпе, виртуаллӑ шлемсемпе, шахмат сӗтелӗсемпе, ноутбуксемпе оборудованиленеççӗ.

Центрта «Информатика», «ОБЖ», «Технологи» предмечӗсем енӗпе ҫӗнетнӗ пӗлӳ памалли программăсене кӑна мар, IT-технологисем, медиатехнологисем, шахмат, проект тата уроксем хыççăнхи ӗҫ-хӗл енӗпе хушма пӗлӳ памалли программăсемпе те уроксем иртеççӗ.