Ӑҫта ҫуралнӑ – ҫавӑнта кирлӗ пулнӑ

Пирӗн статьян геройне районти ҫынсем лайӑх пӗлеççӗ. Тивӗҫлӗ канӑва тухнӑ хыҫҫӑн та вӑл нумай ҫул ертсе пыракан вырӑнсенче – яла ертсе пынӑ çын. Ӗçлеме чарăннăранпа та икӗ ҫула яхӑн кăна-ха. Ӑна вара – Сергей Ананьевич Салифанова – ҫак кунсенче 75 ҫул пулать. Мӗнле пурăнать-ха ветеран, тесе эпир унран пурнăçӗ çинчен ыйтса пӗлтӗмӗр.

– Сергей Ананьевич, хӑвӑр ҫинчен кăштах каласа парӑр-ха.

– Вӑрҫӑ хыҫҫӑнхи ҫулсенче, 1948 ҫулхи майӑн 20-мӗшӗнче, Хулаçырми ялӗнче çуралнӑ эпӗ. Ял ачи пулнăран-тăр ӗнтӗ, мӗн ачаран паянхи кунчченех яланах ӗҫре пулнă пулнӑ. 66-мӗш çулсенче вӑтам шкултан вӗренсе тухнӑ хыҫҫӑн, Совет Ҫарӗнче службӑра тӑтăм. Пӗлӳ туртӑмӗ пулнӑ пулӗ – Ульяновскри патшалӑх педагогика университетне вӗренме кӗтӗм. Ку ӗнтӗ эпӗ лайӑх вӗреннинчен, вӑтам шкултан вӗренсе тухнӑ хыҫҫӑнах Тури Тимӗрҫел ялӗнче вӗрентекен пулса ӗҫлеме пуҫланинчен килчӗ пулӗ, тесе шутлатӑп. Ҫартан таврӑнсан хамăр ялти шкула математика вӗрентекенӗ пулма чӗнчӗç. 1979 ҫултан вара ҫак шкула ертсе пыма пуҫларӑм.

Çемье çавăртăм, виҫӗ ывăлăм пур.

– 70-мӗш ҫулсенчен пуçласа сирӗн яланах ертсе пыракан вырӑнсенче ӗҫлеме тивнӗ. Ӗҫӗр кӑмӑла кайнă пулӗ?

– Юратнӑ пулӗ тетӗп. Яваплӑха туйса тӑнине пӗлетӗп. Сана вӗт камсем-тăр çак ӗçе пултарасса шанса параççӗ-çке. Ҫавӑнпа та  тӑрӑшрӑм. Ӗҫленӗ хушăра вара эпир ҫавӑн пек ӑру пултăмăр –  çулăмланса ӗçлеме тӳрӗ килчӗ. Пурнӑҫа, ялăма, халӑха юратрăм. Вӗсем мана хисеплерӗç – эпӗ вӗсемпе пӗрле пурӑнтӑм, ҫавӑнпа паян та хамăр ялăн ҫыннисенчен кашнинех тав туса пурăнатăп.

– Сирӗн ачалăхра, çамрăклăх çулӗсенче мӗнле ӗмӗт пулнӑ?

– Вӑл – вӗрентекен пулассиччӗ. Анчах шӑпан хӑйӗн ҫул-йӗрӗ. 80-мӗш ҫулсен пуҫламӑшӗнче парти ретне кӗрсен, ҫак парти пурнӑҫӗ мана ҫавӑрса илчӗ. 1983 ҫултанпа «Путь Ленина» колхозăн парти комитечӗн секретарӗ пулса ӗҫлеме пуçларăм. Ҫав колхозах ертсе пыма та тӳрӗ килчӗ. Ку 1991-1996 ҫулсенче пулчӗ.

Тӑрӑшса ӗҫлерӗм, тесе калама пултаратӑп. Ертӳçӗсем панӑ Хисеп грамотисем, «Ӗçри хастарлăхшăн», «ТАССР йӗркеленнӗренпе 90 ҫул» медальсем  ҫакна ҫирӗплетеҫҫӗ, – тесе шутлатӑп.

– Сергей Ананьевич, эсир депутат та пулса тăнă çын, 20 ҫула яхӑн ял пуҫлӑхӗнче те ӗçлерӗр. Паян вара, сирӗн хулпуҫҫи ҫинчен пӗтӗм яваплăх ансан, пурнăç мӗнлерех пырать?

– Паян та аван. Ура ҫинче ҫӳретӗп, Турра тав. Манӑн ывӑлсем питӗ лайӑх ҫынсем пулса ҫитӗнчӗç. Мӑнукăмсем килсех çӳреççӗ. Ялти тӗрлӗ учрежденисене тӗлпулăва чӗнеҫҫӗ. Манпа юнашар мăшăрăм. Анчах та вӑл урисемпе нушаланать – эпӗ вара ӑна пулӑшакан. Халӑхра ахальтен мар: «Ватлӑх – савӑнӑҫ мар», тенӗ. Ҫамрӑклӑх тунсӑхлаттарать.

Хамӑр ял ҫыннисемпе пӗрле, ентешӗмӗр Николай Угаслов пулăшнипе, нумай тӗрлӗ ӗҫ пурнăçланă ҫулсене час-часах аса илетӗп. Ял кунӗсене ирттерни, районти чи илемлӗ чиркӳсенчен пӗри хута кайни, шкулăмăра нимӗнле программăна та хутшăнмасăр юсани, ялсенчи çулсене йӗркене кӗртни... Вӑй та, энерги те пулнӑ! Турра тав, çавăн пек пулнă, сулланса çӳремен, тетӗп. Пурнăçланă ӗҫсем, манӑн иртнӗ пурнӑҫăм, манӑн ҫемье – паян манӑн мӑнаçлăхăм.

– Тавтапуҫ Сире, Сергей Ананьевич! Нумай ҫуллӑха сывлӑх, паянхи пекех хавхалану, чун-чӗре пуянлăхӗ сунатпӑр!