Сăнавсем çирӗплетнӗ

Хăймалу ялӗнче пурӑнакан Михаил Ананьевич Шленский хӑйӗн 90 ҫулхи юбилейне палӑртса ирттерчӗ.

Хисеплӗ ветерана юбилей ячӗпе саламлама район пуҫлӑхӗн ҫумӗ Алексей Ярухин, Чӑваш Ҫӗпрел ял тӑрӑхӗн пуҫлӑхӗ Виталий Землемеров, Ҫӗпрел районӗнчи шалти ӗҫсен уйрăмӗн ветеранӗсен совечӗн ертӳçи Фариз Шакиров, юбилярăн ӗҫтешӗсем Рафик Яфизов тата Фаркать Шигапов килнӗччӗ.

Шалти ӗҫсен органӗсен ветеранӗ Михаил Ананьевич 1934 ҫулхи декабрӗн 6-мӗшӗнче Хăймалу ялӗнче ҫуралнӑ. Амӑшӗ ир вилнӗ, ашшӗ вӑрҫӑра пуçне хунă. Тӑлӑха тăрса юлнӑ. Виҫӗ пӗртăвана: Михаила тетӗшӗпе тата йӑмӑкӗпе пӗрле ачасен ҫуртне ӑсатаççӗ. Ачасен ҫурчӗ хыҫҫӑн, вӗсем тӑван ялне таврӑнаҫҫӗ.

Юбилярăн хӗрӗсем каланӑ тӑрӑх, Михаил Ананьевич паян та ачасен ҫуртӗнчи хӑйӗн пӗрремӗш вӗрентекенне, вӗрентекенӗсене аса илет, вӗсене вӑл пурне те ятран астӑвать. Унӑн ача ҫуртӗнче ӳкерӗннӗ сӑн ӳкерчӗкӗсем сыхланса юлнӑ, вӑл вӗсене час-часах пӑхса ларать, кашни ачанах ятран пӗлет.

Михаил Ананьевичӑн стройкӑра та, пушар сӳнтерекен командăра та, Инҫетри Ҫӗпӗрте вӑрман каснӑ ҫӗрте те ӗҫлеме тӳрӗ килнӗ.

1962 ҫулта вӑл районти шалти ӗҫсен уйрӑмне ӗçе кӗрет, нумай ҫул хушши оперативлӑ дежурнӑйăн çумӗ пулса ӗҫлет. Тивӗçлӗ канăва Михаил Ананьевич, 1985 ҫулта, старшина званийӗпе тухать. Служба вӑхӑтӗнче вӑл тӗрлӗ преступниксемпе тӗл пулать.

Хăймалу ялӗнче нумай ҫул фельдшер пунктӗнче ӗҫленӗ мăшăрӗпе Евгения Михайловнӑпа пӗрле 65 ҫул пурӑнаççӗ, пӗрле тӑватӑ ача пӑхса ӳстереççӗ. Вӗсен виҫӗ мӑнук тата пӗр кӗçӗн мӑнук пур.

Михаил Ананьевичӑн чыслă ӗҫӗсемшӗн панă нумай награда пур. Ӗҫтешсем палӑртнӑ тӑрӑх, юбиляр кулленхи пурнӑҫра тата ӗҫӗнче тӳрӗ кӑмӑлпа, яваплӑхпа, тӑрӑшулăхпа палӑрса тӑрать. Ӗмӗр тӑршшӗпех сывӑ пурнӑҫ йӗрки илсе пырать.

Шел пулин те, юлашки ҫулсенче юбилярăн сывлӑхӗ хавшаса кайнă, ăна инсульт пулнă, врачсем, ҫемйи, ачисем пулӑшнипе ура ҫине тӑрать. Хальхи вӑхӑтра юбилярăн хӗрӗсем Антонинӑпа Валентина черетпе яла ашшӗ-амӑшӗсем патне таврӑнаҫҫӗ, вӗсене пӑхса тăраççӗ.