Районта хисепе тивӗҫлӗ хӗрарӑмсем пурах

Ашшӗ професси енӗпе строитель пулнӑ, амӑшӗ — зоотехник. Туслӑ çемьере икӗ хӗр ӳссе çитӗнет. Ольга Çӗнӗ Йӗлмел вӑтам шкулне пӗтернӗ хыҫҫӑн, куҫӑмсӑр майпа, И. Н. Ульянов ячӗллӗ Чӑваш патшалӑх университетӗнче, филологи факультетӗнче вӗренет. 

Ольга Борисовна 1999 ҫулхи август уйӑхӗнче хӑйӗн тӑван ялӗнче районти потребительсен обществин лавккинче сутуҫӑ пулса ӗҫлеме пуҫлать. 2000 ҫултан пуҫласа 2005 ҫулччен вырӑнти хӑй тытӑмлӑх органӗнче счетовод-кассир пулса ӗçлет. 2006 ҫулхи ноябрӗн 2006-мӗшӗнче ӑна, яваплӑ ӗçчене, Çӗнӗ Йӗлмел ял тӑрӑхӗн Ӗç тӑвакан комитечӗн секретарӗн тивӗҫӗсене пурнӑҫлама шанса параççӗ.

— Унӑн ӗҫ-хӗлӗн тӗп пайӗ тӑван ялпа çыхăннă, муниципаллă ӗçре ӗҫ стажӗ 20 ҫула яхӑн. Вырӑнти хӑй тытӑмлӑх органӗнче ӗҫленӗ ҫулсенче Ольга Борисовна хӑйне тӳрӗ кӑмӑллă ӗҫчен, халӑхӑн ӗҫӗсемпе интересӗсемшӗн тăрăшакан ҫын пек кӑтартрӗ. Вӑл хӑйӗн тивӗҫӗсене тӗплӗн те вӑхӑтра пурнӑҫлать, документацие тирпейлӗн, тӗрӗс илсе пырать. Организаторла пысӑк пултарулӑхӗ пур. Кулленех çынсемпе тӗл пулсан, вӑл вӗсемпе питӗ хӑвӑрт пӗр чӗлхе тупать, вӗсемпе кӑмӑллӑн калаҫать. Унра тӳрӗ кӑмӑллӑх, ҫынсене яланах пулӑшма хатӗрри, ҫавӑн пекех вӑл хӑйӗн ӗç тивӗҫӗсене чыслăн пурнӑҫлани палăрса тăрать тата ялти обществӑлла пурнӑҫа хутшӑнать, — тет ун çинчен ял тăрăхӗн пуçлăхӗ Роберт Дружков. 

Ольга Борисовна, 2001 ҫулта, хӑйӗн шӑпине савнă каччипе, ялăн ӗçе юратакан çыннипе Сергей Макаровпа ҫыхӑнтарать. Вӗсем çирӗп ҫемье йӗркелесе, чӗрӗк ӗмӗре яхӑн пӗрле шăкăлтатса, килӗштерсе пурӑнаççӗ. Ҫемье пуҫлӑхӗ, Сергей Николаевич, Хусанти «Автодор» строительство кампанийӗнче вахта меслечӗпе ӗçлет, хальхи вӑхӑтра Пушкӑрт Республикинчи М-12 федераци трассине тунӑ çӗрте вăй хурать. 

Ольга Борисовна виçӗ ача амăшӗ. Хӗрӗ, Кристина, Ульяновскри фармацевтика колледжӗнчен вӗренсе тухса, Мускаври «Нео-Фарм» обществăна фармацевт пулса ӗçе вырнаҫнӑ. Ывӑлӗ, Алексей, Ульяновскри хула строительствин тата право уйрӑмӗн колледжӗн 5-мӗш курс студенчӗ, строительство ӗҫӗсен мастерӗн специальноҫне алла илме ӗмӗтленет. Кӗҫӗн ывӑлӗ, Константин, хальхи вӑхӑтра ялти шкулта 5 класра вӗренет. 

Ольга Борисовна «Единая Россия» партийӗн членӗ те. Çак уйăхӗн çурринче иртерекен, Раҫҫей Президенчӗн суйлавне хатӗрленес тата пахалӑхлӑ ирттерес енӗпе организациллӗ мероприятисенче хастар хутшӑнать. Документаци енӗпе специалист пулнӑ май, Ольга Борисовна хальхи компьютер технологийӗсене лайӑх пӗлет. Сӑмахран, иртнӗ çул Ольга Борисовнана «Муниципаллă управленийӗн тытăмӗнчи чи лайӑх ӗçчен» номинацире республика конкурсне хутшӑнса, «Тутарстан Республикинчи муниципаллă пӗрлӗхӗсен Совечӗ» ассоциаци Дипломне çӗнсе илчӗ. Ҫавӑн пекех, ӑна ТР вырӑнти хӑй тытӑмлӑх органӗсен ялти пӗлтерӗшлӗ ыйтусене татса парас енӗпе ӗҫ тухӑҫлӑхне ӳстернӗшӗн тата нумай ҫул чыслă ӗҫленӗшӗн ҫак ведомствăн Хисеп грамотине парса чыслаççӗ.

Тӳрӗ кӑмӑлпа тухӑҫлӑ ӗҫленӗшӗн, професси ӑсталӑхӗшӗн тата хастарлă пурнӑҫ позицийӗшӗн вăл Раҫҫей Федерацийӗн Патшалӑх Думин депутачӗн И. И. Гильмутдиновăн Тавне, çавӑн пекех, пысăк профессионализмшӑн тата пирӗн район территорийӗнче суйлав кампанийӗсене хатӗрленес тата ирттерес ӗҫе хастар хутшӑннӑшӑн район администрацийӗн Тавне те тивӗçет. 

Ольга Борисовна, халӑх юррисене юрлама юратаканскер, ӗçрен пушӑ вӑхӑтра, районти паллӑ «Калинушка» ансамблӗн йышне те хастар хутшӑнать. Ҫын хӑйӗн ӗҫӗпе чапа тухать, тесе ахаль каламаҫҫӗ халӑхра. Ольга Борисовнӑна чăваш наципе культурпа пуянлӑхне популяризацилес тата упраса хӑварас ӗҫсемшӗн Ҫӗпрелӗнчи Чӑваш наципе культура центрӗн Тав ҫырӑвӗпе наградӑланнӑ. 

Ольга Борисовна ӗҫченлӗхӗпе тата ҫирӗплӗхӗпе палӑрса тӑрать. Коллективра та, ял ҫыннисен хушшинче те вӑл хисеп тата авторитет çӗнсе илчӗ.