Пӗрремӗш вӗрентекене хисеплесе

Шкулсенче, Вӗрентекен кунне уявланӑ май, концертсемпе ытти нумай уяв мероприятийӗсем иртрӗҫ.
Вӗренекенсем хӑйсем те, вӗсен ашшӗ-амӑшӗсем те уйрӑмах хаклă пулнӑ вӗрентекенӗсене саламларӗç.

Ҫавӑн пекех ҫав кун вӗсене тава тивӗҫлӗ ӗҫӗсемшӗн парнелеме те йышӑннӑ.

Ҫӗпрел районӗнчи çар юхăмӗн ветеранӗсен ертӳçи Виктор Петухов та хăйӗн пӗрремӗш вӗрентекенне Клавдия Алексеевна Ефимована хӑй патне чей ӗҫме чӗнчӗ, килӗнче йӗркеленӗ музейӗпе паллаштарчӗ.

Тӗлпулу «Боевая слава» музейре ӑшӑ лару-тӑрура иртрӗ. Вӗсем шкул ҫулӗсене, кунӗсене аса илчӗҫ.

Виктор Петрович Клавдия Алексеевнӑна «Тăван çĕршывăн 1941-1945 çулсенчи Аслă вăрçинче çĕнтернĕренпе 75 çул» медаль тата парнесем пачӗ.

«1969 ҫулхи сентябрӗн 1-мӗшӗ — манӑн пурнӑҫри чи паллӑ пулăм. Эпӗ шкула кайрӑм. Унтанпа 55 ҫул иртрӗ.

Ҫак кӗрхи илемлӗ кун Сире, Клавдия Алексеевна, пире мӗнпур ыррине панăшăн, вулама-çырма вӗрентнӗшӗн ӑшӑ сӑмахсем каласа, чун-чӗререн тав сăмахӗсене пӗлтерес тетӗп. Тавтапуҫ сире юратӑвӑршӑн, чӑтӑмлӑхӑршӑн, ӗҫӗре чунтан парӑннӑшӑн!», — терӗ вӑл.

Клавдия Алексеевна музей экспоначӗсемпе паллашрӗ, хӑйӗн вӗренекенӗпе питӗ мăнаçланнине пӗлтерчӗ.