МИСКИНСЕН — изумруд туй

Вӗсем, 1960 ҫулта, Кивӗ Улхаш вăтам шкулӗнче вӗреннӗ чухне паллашаççӗ. Николай, Çӗнӗ Йӗлмел ялӗнчи 7 ҫуллăх шкултан вӗренсе тухсан, тантӑшӗсемпе пӗрле вӑтам пӗлӳ илме, Кивӗ Улхаш ялне çул тытать. 

 

Ҫӗре юратни Николая Ульяновскри ял хуҫалӑх институтне илсе ҫитерет, агроном профессийӗ уншӑн питӗ ҫывӑх пулнӑ. Унăн ашшӗ, вăрçă ветеранӗ Михаил Петрович хӑйӗн пӗтӗм пурнӑҫне агротехникӑна халалланӑ, апла пулсан, ывăлӗ те ашшӗн çулне суйласа илет.

 

Шкултан вӗренсе тухнӑ хыҫҫӑн, хăйӗнпе пӗрле вӗреннӗ Ольга та çав института «Зооветеринари» отделенине вӗренме кӗрет.

 

Вӗсем иккӗшӗ те ӑнӑҫлӑ вӗреннӗ, спортпа туслашнă. Николай волейбола юратнӑ, Ольга ҫӑмӑл атлетика, йӗлтӗр спорчӗ енӗпе малти вырӑнсене йышӑнса пынă. Спорт енӗпе ҫав хӑнӑхусене ял хуҫалӑх институтӗнче ирттернӗ. Вӑл унта спорт командин членӗ, общество пурнӑҫӗнче хастар пулнӑ. Зоотехника факультечӗн комсомол пурнăçӗнче хастар хутшӑннӑшӑн ăна ВЛКСМăн Ульяновск облаçӗнчи комитечӗ наградӑлать. Кунта вара, Кивӗ Улхашри 3 ҫул хушшинчи ҫамрӑксен туслӑхӗ чӑн-чӑн юратӑва çаврăнать. 1969 ҫулхи июль уйӑхӗнче вӗсем мӑшӑрланаççӗ. Ульяновск облаҫӗнчи чӑх-чӗп фабрикинче хăйӗн специальноçӗпе пӗр ҫул ӗҫленӗ хыҫҫӑн, Ольга Ивановна Ҫӗнӗ Йӗлмел ялне, мăшăрӗ патне таврăнать. 

 

Николай Михайлович вара, 1970 ҫулта, диплом ӗҫне питӗ лайӑх хӳтӗлет. «Ученӑй-агроном» дипломне алла илнӗ хыççăн, ăна направленипе тӑван колхозне яраççӗ. Бауман ячӗллӗ колхозра агроном-семеновод пулма палăртаççӗ. Ҫураки ӗҫӗсем хыҫҫӑн, ҫав ҫулах, ăна 1 ҫулталăка Совет Ҫарӗн ретне илеççӗ. Салтака килӗнче амӑшӗ Мария Петровна, юратнӑ мăшăрӗ Ольга тата хӗрӗ Надежда кӗтсе илеççӗ.

 

Малтанласа Ольга Михайловна 2-3 ҫул хӑйӗн специальноҫӗпе зоотехник пулса ӗҫлет, анчах ял хуҫалӑх производствинче иккӗшне те «ирхи шуçăмпа пуҫласа тӗттӗм пуличченех» ӗҫлеме кăткăсрах пулать, ҫитменнине тата иккӗмӗш ачи — ывӑлӗ ҫуралать. Ҫӗнӗ Йӗлмел ялӗнчи Перекет кассин уйрăмӗнче кассир-контролер вакансийӗ килсе тухсан, вӑл килӗшет, ҫак ӗҫе 30 ҫул ытла тӳрӗ кӑмӑлпа пурнӑҫлать. Вӗсем иккӗшӗ те ӗҫ ветеранӗсем.

 

Мискинсен ҫемйи нумай ачаллӑ, унта 5 ача тивӗҫлӗ воспитанипе пӗлӳ илнӗ. Хӗрӗ Надежда — районти тӗп больницăн хирурги уйрӑмӗнче медицина сестри, Теччӗ ял хуҫалӑх колледжне хӗрлӗ дипломпа пӗтернӗ Михаил ялта фермер пулса ӗҫлет, Татьяна — Çӗнӗ Йӗлмел ФАПӗн медицина сестри, Андрей — район судӗнче администратор, кӗҫӗнни Петр — ялти МФЦ ҫумӗнчи газ операторӗ, ҫуллахи сезонра тетӗшне Михаила ял хуҫалӑх машинисемпе акма, тырпул пухса кӗртме пулӑшать. Мискинсен пысӑк та туслӑ ҫемйин пӗлтерӗшне, кунта эпир, паллах, вӗсен ашшӗ-амӑшӗн тӗслӗхӗнче куратпăр.

 

Ольга Ивановна, 5 ача ҫуратса ӳстернӗ нумай ачаллӑ анне пулнă май, II степеньлӗ «Ача амӑшӗн медальне» тивӗçет.

Ҫапла, нумай пулмасть кăна -ха ҫак ҫемьене, 5 ҫул каялла, район администрацийӗ ылтӑн туй ячӗпе саламларӗ, паян вара ҫемье — пӗрле пурӑнма пуçланăранпа 55 ҫул ҫитнине — палӑртать. Паян аслашшӗпе асламӑшне, кукамăшшӗпе кукамăшне 11 мӑнукпа 3 мӑнук савӑнтараҫҫӗ. 

 

Мискинсен ҫемйи пуҫарнипе Ҫӗнӗ Йӗлмел ялӗ ҫумӗнчи çăлкуç патӗнче Мускаври телейлӗ Матронӑн ячӗпе часовня-купель те туса лартнă.

Николай Михайловичпа Ольга Ивановна кирек ӑҫта ӗҫлесен те, вӗсем çинчен ҫӗр ӗҫченӗсем, ялти тата районти тӗрлӗ категорири граждансен представителӗсем хисеплесе кăна, ăшшăн калаçаççӗ. Ҫапла, Николай Михайлович 1971 ҫултан пуçласа 1985 ҫулччен колхозӑн тӗп агрономӗпе профсоюз комитечӗн председателӗн ӗҫӗсене туса пынӑ. 1983 ҫулта тырпул тата сахӑр чӗкӗнтӗрӗн тухăçӗн пысӑк кӑтартӑвӗсемшӗн ӑна «ТАССР тава тивӗҫлӗ агрономӗ» ят панӑ. 1985 ҫулхи ноябрьтен пуҫласа 1987 ҫулхи март уйӑхӗччен — Бауман ячӗллӗ колхозăн парти комитечӗн секретарӗ. 1987 ҫулта ăна Ҫӗпрелӗнчи ял хуҫалӑх управленийӗн ҫӗрӗç енӗпе начальник пулма палăртаççӗ. 1991 ҫулта Николай Михайловича «Ильмово» колхоз председательне суйланӑ. 2002 ҫулта районти ӳсентӑрансене хӳтӗлес енӗпе станцийӗн начальникӗ пулма палӑртаççӗ, ку ӗҫе 2015 ҫулччен пурнăçласа пырать. Ӗҫленӗ хушăра Николай Мискина Хисеп грамотисемпе, СССР Пӗтӗм Раççейри ял хуçалăх выставкин бронза медалӗпе, ТАССР Пӗтӗм Раççейри ял хуçалăх выставкин Хисеп грамотипе, «Ҫӗпрел районӗ йӗркеленнӗренпе 90 ҫул» медальпе наградӑланӑ. 

 

Вӑл ялăн обществӑллӑ пурнӑҫăнче активлă хутшăнакан, район совечӗн депутачӗ тата Çӗнӗ Йӗлмел ял совечӗн депутачӗ пулса суйланнă. 

 

Тивӗҫлӗ канура пулсан та, Мискинсен ҫемйи ахаль лармасть, хуҫалӑхри юратнӑ ӗҫсемпе аппаланать. Николай Михайлович пыл хурчӗсем ӗрчетет, ученӑй-агроном пулнă май, ҫӗрулмин çӗнӗ сорчӗсене ӳстерет. Ольга Ивановна хушма хуҫалӑхра кайӑк-кӗшӗк усрать, пахчинче пахчаҫимӗҫ ӳстерет, ҫӗвӗ машинипе те çӗлеме юратать, юратнă мӑнукӗсем валли мӗн те пулин ҫӗлесе парать. Вӗсен килӗнче яланах тирпейлӗх хуçаланать, ҫутӑ, канлӗ — ку вӑл ӗçчен те тараватлă кил хуҫи хӗрарӑмӗн Ольга Ивановнан тăрăшулăхӗ. 

 

Вӑл ҫемье архивӗнче хаклӑ наградӑсенчен пӗрне упрать — ку вăл тухӑҫлӑ ӗҫшӗн тата перекет банкӗн ӗҫне аталантарнӑшӑн Раççей Банкӗн Президенчӗн П. И. Жихаревăн Тав туни. Ольга Ивановнана нумай ҫул чыслă ӗçленӗшӗн тата нумай парнесемпе, Дипломсемпе, Хисеп хучӗсемпе чысланă, документсен папкинче ТР Президентӗнчен М. Ш. Шаймиевран килнӗ саламлă çыру та упранать. 

 

Çемье çулталăкӗ пулнă май, илемлӗ мăшăра изумруд туйпа саламласа, ырлăх-сывлăх, ачисемпе савăнса пурăнма, çаплах, чи телейлисем пулса, ӳссе çитӗнекен ăрушăн тӗслӗхлӗ çемье пулса юлма сунатпăр.