Курэш — наци спорчӗ

14-мӗш хут ирттерекен ӑмӑртӑва Шланка, Матак, Алешкин-Саплăк, Хураката, Тутар Паснапуç, Кӗçӗн Чăнлă ялӗсенчен тата кавир хуçисем — Кивӗ Кахăрлăран 100 ҫынна яхӑн пухӑннӑччӗ.
Кунӗпене тăсăлнă тата тӗрлӗ виҫе йывăрăшӗнче пынă ӑмӑртӑва муниципаллă районăн Ӗҫ тӑвакан комитечӗн ертӳҫин ҫумӗ Айрат Залялов савӑнӑҫлӑ лару-тӑрура уҫрӗ. Мероприятие паллӑ ҫынсем те, легендарлӑ кӗрешӳçӗсем те килнӗччӗ.

— Кивӗ Кахăрлă — ӗлӗк-ӗлӗкрен хӑйӗн кӗрешӳçисемпе чапа тухнӑ. Тутар кӗрешӗвӗн историне ячӗсем кӗрсе юлнă паттăрсем пур. Ентешӗмӗр, «ТР муниципаллă пӗрлӗхӗсен Совечӗ» Ассоциаци ертӳçи Агзам Гобайдуллин çавăн пеккисенчен пӗри. Вӑл — кӗрешӳ енӗпе спорт мастерӗ, Раҫҫей тата Тутарстан чемпионӗ. Унсӑр пуҫне районти Сабантуйсен абсолютлӑ паттӑрӗ Рафагать Фасхутдинов та спорт мастерӗн кандидачӗ тата ытти нумай паллă çынсем пур, — терӗ ял тăрăхӗн пуҫлӑхӗ Рустам Фаткуллин мероприятие уҫнӑ вăхăтра. 

Ял тӑрӑхӗн пуҫлӑхӗ те наци кӗрешӗвне аталантарассишӗн пысӑк пай кӗртни çинчен каласа хăварас пулать. Ялти Культура çурчӗн заведующийӗ пулса ӗçленӗ çулсенче Рустам Фаткуллин кӗрешӳ кружокне хӑй ертсе пырать, унтан ҫак ӗҫе унӑн ывӑлӗ Расим малалла тӑсать. Ҫав ҫулсенче шкул кӗрешӳ енӗпе чемпион ятне çӗнсе илет. Паян кӗрешӳ кружокӗн ертӳҫи — çутӗç ветеранӗ, нумай ҫул шкул директорӗ пулса ӗҫленӗ Наиль Исхаков. Ҫиччӗмӗш теçеткен вакланă Наиль Исаков район шайӗнчи кӗрешӳ енӗпе ăмăртусенче, Сабантуйсенче судья тивӗҫӗсене пурнӑҫлать. 

Ку хутӗнче те Кивӗ Кахăрлăра кӗрешекенсем илемлӗ меслетсемпе савӑнтарчӗҫ. Хӑйӗн виçе категорийӗнче ҫӗнтернӗ ҫамрӑк кӗрешӳçӗсене Хисеп грамотисем, медальсем, парнесем пачӗç. Ҫавӑн пекех, чи илемлӗ кӗрешӳ мелне кăтартнăшăн Айнур Молотков уйрăм парнене тивӗçлӗ пулчӗ.

14 ҫул хушши иртекен мероприятийӗн хӑйӗн спонсорӗсем пур. Вӗсем — Наиль Шайдуллин, Айрат Усманов, Фаниль Замалетдинов, Айрат Иматдинов, Айрат Губайдуллин, Рамис Фаткуллин, Ильмас Ситдиков, Рифкать Аббазов, Нагим Фасхутдинов.