Йывӑрлӑхсене ҫӗнтерсе

Тӑван çӗршывӑн Аслӑ вӑрҫи илсе килнӗ йывăрлăхсем, ҫывӑх ҫыннисен ҫухатӑвӗн хуйхи, лаша вырăнне кӳлӗнсе ӗçлени — ҫаксем пурте 80, 90, 95 ҫулсенчи асатте-кукаçейсене, асанне-кукамайсене тӳрӗ килнӗ шăпа сăнавӗсем. Ҫак йывӑрлӑхсене тӳссе ирттернӗ Тауфик Сафиуллович Яфизов та 90 ҫул тултарчӗ. 

Вӑрҫӑ пуҫлансан Тауфик 1-мӗш класа вӗренме каять. Ашшӗне вӑрҫӑн малтанхи кунӗсенчех фронта илеççӗ. Ҫемьере тӑватӑ ача амӑшӗпе ҫеҫ тăрса юлать. Ҫимелли те, тăхăнма тум та, хутма вутă те пулман.

Ҫакнашкал йывӑрлӑха лекнӗ ҫемьери ачасене ҫав ҫулсенче уҫӑлнӑ Мучелей ялӗнчи ача ҫуртне вырнаҫтарнӑ. Çиме апачӗ пулӗ хуть тесе, Тауфикпа тата тепӗр ачине амăшӗ çавăнта илсе кайса вырнаçтарать.

Вӑрҫӑ вӗçленсен, Тауфик, ашшӗ таврӑнни ҫинчен илтсен, пӗр-тăванӗпе пӗрле унтан тухса тарса, килне килет. 

Пурнӑҫ йӗркеленет. Сафиулла пичче колхозра бригадир пулса ӗҫлет. Хăй патне вӑл ывӑлӗсене те ӗçе илет. 
Шкултан вӗренсе тухнӑ хыҫҫӑн, Тауфик тракторист профессине алла илет. Ҫар службине каять. Ҫамрӑк каччăн служби Белоруссире иртет. 1954 ҫулта Тоцк хулинче службӑра тӑнӑ чухне атом бомбине тӗрӗслесе пăхнă ҫӗре хутшӑнать.

Ҫартан таврӑннӑ хыҫҫӑн хăйпе пӗр ял хӗрӗпе Гульсирапа çемье çавăрать. Анчах вӗсен çемье телейӗ нумая пымасть. Виҫҫӗмӗш ачине çуратнă чухне мăшăрӗ вилет. Икӗ ача тӑлӑха юлать. Йăмăкӗн ачисем тӑлӑха ан юлччӗр тесе, Гельсиран аппăшӗ Рушания Тауфика качча тухать.

Вӗсем 39 ҫул пӗрле пурӑнаççӗ. Çемьере тата икӗ ача ҫуралать. Паянхи кун тӗлне мăшăрӗ Рушания та çут тӗнчепе сывпуллашнă. Ачисем Çӗнӗ Çӗпрел ялӗнче ӗмӗр ӗмӗрлеççӗ, пӗр ывӑлӗ Хусанта пурӑнать. Ывӑлӗсенчен пӗри ятарлӑ ҫар операцийӗнче хутшӑнать.

Тауфик пичче ӗмӗр тӑршшӗпех чыслă ӗçлет, тивӗҫлӗ канăва тырӑ заводӗнче ӗҫлесе тухать. Хальхи вӑхӑтра юбиляра 9 мӑнук, 8 кӗçӗн мӑнук савăнтараççӗ. 

Ялти ватă çынна хӗрӗ Дамира пӑхать. Сывлӑхӗ кӑштах хавшанă пулин те, вӑл хӑйӗн ачисене тав тӑвать, вӗсене ӑслӑ канашӗсене парать, вӗсемшӗн савӑнать, пурнăçран илем тупса пурăнать.

Юбилей ячӗпе Тафик пиччен ачисем пуҫтарӑнса уяв туса ирттерчӗç. Уява районти Ӗҫ тӑвакан комитетăн ертӳҫи Рустам Мухаметзянов, ял тăрăхӗчен представительсем килнӗччӗ. Ăна ырлăх-сывлăх, лайăх кăмăл-туйăм, тăнăçлăх сунчӗç, парнесем пачӗç.