Çуралнă кунӗпе Президент саламӗ

Мартăн 12-мӗшӗнче Матак ялӗнче пурăнакан тыл ӗçченӗ, вăрçă ветеранӗн тăлăх мăшăрӗ Ольга Васильевна Мидюкина та 95 çулхи юбилей ячӗпе саламлă сăмахсем йышăнчӗ.

Тыл ӗçченне район пуçлăхӗ çумӗ Алексей Ярухин тата ял тăрăхӗн пуçлăхӗ Владимир Шумилов ăшшăн саламларӗç, юбиляра РФ Президенчӗн саламлă открыткине, район пуçлăхӗ ятӗнчен парне, чечек пачӗç. Вăрçă тата ун хыççăнхи йывăр çулсенчи ӗçӗсемшӗн тав турӗç, сывлăх тата çывăх çыннисен тимлӗхне сунчӗç.

Ольга Васильевна Чăваш Ишлӗ ялӗнче çуралса ӳсет. Ашшӗ Тăван çӗршывăн Аслă вăрçинче хутшăннă, вăрçăран таврăнсанах, сурансене пула çӗре кӗрет. Амăшӗ ачисене пӗчченех ӳстерет. Çав çулсенче вӗренме те май пулман, паллах. Çулӗ çитмен хӗре колхозăн уй-хирӗнче ӗçлеме тӳр килнӗ.

Ольга Васильевна вăрçăран таврăннă Матак ялӗн каччипе, Николай Владимировичпа, çемье çавăрать. Виçӗ ача, икӗ ывăлпа пӗр хӗр, пăхса ӳстереççӗ вӗсем. Нумай çул каялла пӗр ывăлне юлашки çула ăсатнă. Мăшăрӗ те 24 çул каялла вилнӗ, иккен. Хальхи вăхăтра юбиляр вăрçă ветеранӗсене программăпа туса панă пӳртре пурăнать. Сывлăхӗ кăштах хавшанă пулсан та, пӳртӗнче кăштăртатса çӳрет-ха. Телевизор пăхма юратать. 

Ачисенчен, мăну-кӗсенчен те тимлӗх пур. Телейлӗ вăл, унăн 8 мăнук тата 6 кӗçӗн мăнук. Юнашарах, тӗп çурта, кӗçӗн ывăлӗпе мăнукӗсем пурăнаççӗ. Мăнукӗсем ун патӗнчен тухмаççӗ те, темелле. Яланах пăхса, мӗн кирлине кӳрсе парса, пур енчен те пулăшса тăраççӗ. Çакна та каласа хăварас пулать, хальхи вăхăтра тыл ӗçченӗн мăнукӗ, ятарлă çар операцийӗнче çӗршыв тăнăçлăхне сыхлать. «Ырă-сывă кăна çӳретӗрччӗ», — тет асламăшӗ мăнукӗшӗн хуйхăрса. Юбилярăн хӗрӗ вара, Шăмăршă районӗнче пурăнать. 

Ольга Васильевнăна саламлама юратнă кӳрши тата чăваш тумӗсем тăхăнса, ялти культура ӗçченӗсем те килнӗччӗ. Вӗсем ăна юрăсем парнелерӗç. Юбиляр район пуçлăхӗн çумӗ саламлама килнӗшӗн питӗ савăнчӗ, тимлӗх панăшăн пурне те чунтан тав турӗ.