Ӗçне курса хисеп

Пурăннă пулсан, вăл 95 ҫул тултарнӑ пулӗччӗ. 

Ӗç тăвакан комитетăн ертӳҫи Рустам Мухаметзянов палӑртнӑ тӑрӑх, Çӗпрел ҫыннисем мухтавлӑ ҫул утса тухнӑ ентешӗсемпе тивӗçлипе мăнаçланаҫҫӗ, вӗсене асра тытаççӗ, историе ӑруран ӑрӑва парса пыраççӗ.

Кивӗ Чукал пӗтӗмӗшле пӗлӳ паракан вăтам шкулăн вӗренекенӗсем (унта Çӗнӗ Чукал ялӗн ачисем те вӗренеççӗ) Геройăн пурнӑҫӗпе ӗҫ-хӗлне халалланӑ сӑвӑсем каларӗҫ.

Кивӗ Чукал ял тăрăхӗн пуçлăхӗ Альфик Низамов пӗр ял ҫыннин ӗçӗ, çитӗнӗвӗсем ҫинчен каласа иртрӗ.
Мероприятие килнисем Равиль Низаметдинов бюсчӗ умне чечексем хучӗҫ, ӑна пӗр минут хушши шăп тăрса аса илчӗç. 

Справка

Равиль Низаметдинов 1929 ҫулхи мартăн 10-мӗшӗнче Ҫӗнӗ Чукал ялӗнче колхозник ҫемйинче ҫуралнӑ. Ачаллах Равиль ашшӗ-амӑшӗсӗр тăрса юлнӑ. Ҫичӗ класс пӗтернӗ хыҫҫӑн Тукай ячӗллӗ колхозра ӗҫлеме пуҫлать. Флотра службӑра тӑнӑ хыҫҫӑн ӑна колхоз председателӗн çумӗ пулма палăртаççӗ. Ҫав ҫулсенчех куçăмсăр майпа аслӑ пӗлӳ илет. Ҫичӗ ҫултан пӗрлешӳллӗ Бауман ячӗллӗ колхоз председателӗ пулма суйласа лартаççӗ, темиҫе ҫултан ял хуҫалӑх управленийӗн начальникне ӗçне шанса параççӗ. 

1972 ҫулхи кӗркунне ӑна Набережные Челны хулин теплица комбиначӗн директорӗ пулма çирӗплетеççӗ. Унта вӑл «Весенний» совхоза йӗркелет. Вӑл ертсе пынипе 30 гектар лаптӑка йышăннă ӑшӑ теплица хуҫалӑхӗ туса хураççӗ, унта хӗлӗпех хӑяр, помидор, симӗс сухан, столовӑй валли специсем ӳстереççӗ. Хуҫалӑх таврари хуласемпе ялсене витаминлă пахчаҫимӗҫсем парса тӑрать. Вунӑ ҫул ҫурӑ хушши пирӗн ентеш ертсе пыракан совхоз пахчаҫимӗҫ ӳстерес енӗпе СССРта малта пыракансенчен пулса тăрать.

Паттăр ентешӗмӗрӗн чӗри 1993 ҫулхи июнӗн 10-мӗшӗнче, 64 ҫулта, тапма чарӑнать. Набережные Челны хулин Зяб поселокӗнче тата Ҫӗпрел районӗн центрӗнче унӑн ятне ҫӳретекен урамсем пур. 

Ял хуҫалӑх производствинче ҫитӗнӳсем тунӑшӑн 1966 ҫулта Ӗҫлӗх Хӗрлӗ Ялав орденне, 1971 ҫулта «Хисеп палли» ята, РСФСР тава тивӗҫлӗ ял хуҫалӑх ӗçченӗ ятне тивӗçлӗ пулать, Пӗтӗм Союзри Халӑх хуҫалӑхӗн ҫитӗнӗвӗсен ылтӑн, кӗмӗл тата бронза медалӗсемпе, Ленин орденӗпе, «Ҫурлапа Мӑлатук» ылтӑн медальпе наградӑланать.