Алтайра та пулнӑ каччă

Ҫичӗ ҫул вӗренмелли шкултан вӗренсе тухнӑ хыҫҫӑн, Равиль Зайдуллович район центрӗнче училищӗре шофера вӗренет. Водитель правине илнӗ хыҫҫӑн, ҫӗршыв умӗнчи ҫар тивӗҫне пурнӑҫлама каять, СССР Хӗҫ-пӑшаллӑ Вӑйӗсен ретӗнче тӑватӑ ҫул службӑра тӑрать. Ҫакӑн хыҫҫӑн Ямашев ячӗллӗ колхозра малтан механик, унтан бензовоз водителӗ пулса ӗҫлет. Колхоз валли улӑм турттарса килме Алтай крайне ҫитиех каять. Ветеран тивӗҫлӗ канӑва тухиччен те, ун хыҫҫӑн та 70 ҫула ҫитиччен бензовозпа ӗçлет.

Ҫамрӑк чухне хăйӗн ялӗнчи хӗрпе Римма Ахметзяновнапа çемье çавăрать. Вӗсем виҫӗ ывӑлпа пӗр хӗр пӑхса ӳстереççӗ.

Равиль Зайдулловича хăйӗн пурнӑҫӗнче савӑнӑҫне те, хуйхине та тӳссе ирттерме тӳрӗ килнӗ: Чернобыльри АЭСри инкек хыҫҫӑн çамрăклах вилнӗ хӗрӗпе кӗрӗвне юлашки çула ăсатнă.

— Хамӑр ачасене хамăртан маларах пытарма питӗ йывӑр, — теҫҫӗ Зайдулловсем.

Килӗнче Зайдулловсем иккӗшӗ кăна пурӑнаҫҫӗ. Ачисем час-часах килеҫҫӗ, кӳршӗсем те кӗреҫҫӗ, пулӑшаҫҫӗ.

Хисеплӗ ватӑсен 5 мӑнукпа 3 кӗçӗн мӑнук пур. Равиль Зайдулловичăн юбилейӗ кунӗнче унӑн ачисем, мӑнукӗсем, кӗçӗн мăнукӗсем пурте килнӗччӗ.

Тыл ӗҫченне тата ӗҫ ветеранне саламлама районти Ӗҫ тӑвакан комитетӑн ертӳçин экономика аталанӑвӗ, финанссем тата ял хуҫалӑх производствин енӗпе ҫумӗ Ильмир Измайлов, Звезда ял тӑрӑхӗн пуҫлӑхӗ Марина Денисова та килнӗччӗ.