Казан мәктәбендә атыш вакытында һәлак булган укытучы Чүпрәле районыннан

Бүген Казанда башлангыч сыйныф укытучысы Венера Айзатова белән хушлашалар, аңа 55 яшь иде.  Ул Казанның 175 нче мәктәбендә кичәге ату вакытында сыйныфтан чыга.

Венера Солтангәрәй кызы Айзятова - Чүпрәле районыннан. Ул Иске Кәкерле авылында туа, урта мәктәпне тәмамлый. Югары белем алгач, ул туган авылына кайта, мәктәптә педагогик хезмәт эшчәнлеген башлый. Кияүгә чыккач, педагог Казанга китә.

Без Венера Айзятованың якыннары  Минхасил абый Айсин белән элемтәгә кердек. Ул барлык туганнары һәм якыннары, шулай ук тормыш иптәше  Тәслия апаның Казанда булуы турында сөйләде. Кызганычка каршы, сәламәтлеге буенча ул үзе бара алмаган.

«Җирләү булачак. Аңа кадәр аның гәүдәсен моргтан алачаклар. Аны Казанда җирләячәкләр, - диде ул. - Венераның кызы һәм ике оныгы бар. Күптән түгел ул ирен югалтты".

Минхасил абый Айсинның сүзләренә караганда, Венера Солтангәрәй кызы бик игелекле һәм ярдәмчел булган, һәрвакыт авылга кайткан. Төп йортта инде  беркем дә калмаса да, алар туганнары белән ремонт ясап, төп нигезне карап торганнар.

"Күптән түгел генә барысы да җыелып, ифтар ашы уздырдылар, авыл халкын чакырдылар", - дип сөйләде Минхасил абый.

Укучылары да Венера Солтангәрәевнаны иң яхшы укытучы буларак хәтерлиләр. «Ул безгә рус теле укытты. Аның дәресләре аеруча кызыклы уза иде, мин аларны әле дә хәтерлим», - дип сөйләде Иске Кәкерле авылында яшәүче Резедә Әһлиуллина.

Казан шәһәренең 175-нче номерлы гимназиясендә Венера Айзятова башлангыч сыйныфларны укыткан. Аның эш стажы 30 елдан артык.

Казан мәктәбендә булган фаҗигале хәл Чүпрәле районының барлык кешеләрен тетрәндерде. Чүпрәлеләр Венера Солтангәрәевнаның туганнарының һәм якыннарының югалту кайгысын уртаклашалар.