Йорт иясе һәм 300 еллык тарихы булган Михайловлар гаиләсе муниципаль бәйгедә җиңү яулады

Йорт иясе һәм 300 еллык тарихы булган гаилә Чүпрәле районында «Без тарихта эзлебез» республика конкурсының муниципаль этабында җиңү яулады.

Ул шәҗәрә традицияләрен саклауга, гаилә бәйләнешләрен һәм буыннар дәвамчанлыгын ныгытуга юнәлдерелгән иде. Оештыручы-Татарстан Республикасының Архив эше буенча Дәүләт комитеты.

Фестивальдә районның төрле авылларыннан өч гаилә катнашты, аларның һәркайсы  районыбызда дус, тату яшәүче татар һәм чуваш мәдәниятен тәкъдим итте. Өч гаилә: Алешкин-Саплык авылыннан Клементьевлар, Иске Шәйморзадан Абдрәкыйповлар гаиләсе һәм Хорновар-Шигали авылыннан Михайловлар гаиләсе катнашты.

Чара фойедагы күргәзмәдән башланды, анда гаиләләр үзләре төзегән шәҗәрәләрне, шулай ук традицион гаилә һәм милли ризыкларны тәкъдим иттеләр.  Фестивальнең икенче өлеше сәхнәдә дәвам итте. Сәламләү сүзе белән район башкарма комитеты җитәкчесе Рөстәм Мөхәммәтҗанов чыгыш ясады, ул катнашучыларга киләчәк буыннар өчен гаилә тарихын саклау буенча зур әзерлек эшләре өчен рәхмәт белдерде һәм район этабында җиңүчегә уңышлар теләде.

Бәйгенең иҗади өлешендә һәр гаилә визит карточкасы һәм нәфис номер тәкъдим итте. Клементьевлар гаиләсе ( Наталья Клементьева берничә тапкыр республика конкурсларында җиңүче булып санала) улларының махсус хәрби операция зонасында хезмәт итүенә багышланган эмоциональ чыгыш әзерләгән иде.

Иске Шәйморзадан Әбдрәкыйповлар, авыл чараларында актив катнашучы буларак, татар мәдәниятен тәкъдим иттеләр: алар конкурска традицион ризыклар, шул исәптән бармак алып килгән иделәр, ә сәхнәдә үзләренең шәҗәрәләре турында сөйләделәр һәм халык җырын башкардылар. Әбдәкыйповларның шәҗәрәләре агач һәм кояш нурлары рәвешендә тәкъдим ителгән иде.

300 елдан артык нәсел дәвамчанлыгы булган Михайловлар гаиләсе архив мәгълүматларын тирәнтен тикшергән һәм бәйгедә шушы хакта фотосурәтләр, документлар күрсәтте.. Бәйрәмдә алар кунакларны бәрәңге һәм оннан ясалган «мимер» милли ризыгы белән сыйладылар, ә аларның чыгышы йорт иясе образы белән бизәлде.

Катнашучыларны Татарстан Республикасы Архив эше буенча Дәүләт комитеты һәм Казан мәдәният институты вәкилләре кергән абруйлы жюри бәяләде. Жюри рәисе Оксана Комиссарова барлык гаиләләрнең дә әзерлек дәрәҗәсе югары булуын һәм җиңүчене билгеләүнең катлаулы булуын билгеләп үтте.

Конкурс йомгаклары буенча киләсе этапта район исеменнән чыгыш ясау хокукына Михайловлар гаиләсе ия булды. Икенче урында — Әбдрәкыйповлар, өченче урында-Клементьевлар гаиләсе. Барлык призерлар да мактау грамоталары һәм акчалата сертификатлар белән бүләкләнделәр.

Белешмә

Быел «Без тарихта эзлебез» - «Гаилә тарихында гасырлар кайтавазы»  фестивале сигезенче тапкыр уза. Ул 2019 елда Татарстан Республикасының Архив эше буенча Дәүләт комитеты тарафыннан тәкъдим ителгән һәм буыннар дәвамчанлыгын ныгытуга һәм милли традицияләрне торгызуга юнәлдерелгән.

Фестивальдә берничә буын вәкилләре катнаша ала.  Фестиваль өч этапта үткәрелә: муниципаль, зона һәм республика этапларында. Һәр гаилә шәҗәрә агачы  әзерләргә тиеш. Шәҗәрәдә гаилә династиясе тасвирламасы булырга, шулай ук архив документлары белән расланырга тиеш.