Чүпрәледә Украинада махсус операциядә һәлак булган солатларының гаиләләренә Батырлык ордены тапшырдылар

Бүген,  2 сентябрьдә, Чүпрәле районы Башкарма комитетның утырышлар залында, Донецк һәм Луганск халык республикалары территориясендә махсус операция вакытында хәрби бурычларын үтәгәндә һәлак булган якташ-солдатларыбызның гаиләләренә Батырлык орденнары тапшыру тантанасы булды.

Исегезгә төшерәбез, Чүпрәле районыннан махсус операция вакытында җиде хәрби райондаш егетебез: Чуваш Чүпрәлесе авылыннан Игорь Аръяхов һәм Михаил Чашкин, Яңа Элмәле авылыннан Андрей Годунов, Хорновар-Шигали авылыннан Илья Денисов һәм Олег Ильбеев, Яңа Чәке авылыннан Денис Исаев, Коршанга-Шигали авылыннан Иван Павлов һәлак булды.

Моңарчы райондаш егетләребезнең өчесенең: Илья Денисовның ,Олег Ильбеевның һәм Денис Исаеевның гаиләләренә  дәүләт бүләкләре тапшырылган иде.

Бүген хәрби бурычын үтәгәндә күрсәткән батырлыгы һәм фидакарьлеге өчен район башлыгы Марат Гафаров, Буа һәм Чүпрәле районнары буенча хәрби комиссар Радик Төхфәтуллин хәрбиләр: Игорь Аръяхов, Андрей Годунов, Иван Павлов һәм Михаил Чашкинның әти-әниләренә һәм тормыш иптәшләренә Батырлык Орденнарын тапшырдылар. Андрей Годунов, Батырлык орденыннан тыш, 4 нче дәрәҗә Изге Георгий-Георгий Кресты билгесе белән дә бүләкләнгән..

Район башлыгы ил тынычлыгы, халык иминлеге өчен гомерләрен кызганмаган якташ-солдатларыбызның батырлыгы беркайчан да онытылмаячагын әйтте. Ватанпәрвәр ул үстергән әти-әниләренә рәхмәт сүләрен әйтте. "Каһарман райондашларыбызның якты истәлеге мәңге  хәтердә калачак!",- диде Марат Ринат улы.

Радик Төхфәтуллин, шулай ук, гомерләре бәрабәренә Ватан алдындагы бурычларын үтәгән солдатларның әти-ниләренә хөрмәтен һәм рәхмәтен белдерде.