Чүпрәле районында егетләрне РФ Кораллы Көчләре сафларына озаттылар

Бүген, 2026 елның 18 маенда, иртән Чүпрәле районында егетләрне армиягә озату тантанасы булды. Традиция буенча чара Петр Дементьев исемендәге паркта булды.

Бу юлы Ватанны сакларга Борисов Григорий Борисович (Алешкин-Саплык); Хафизов Диас Нияз улы (Иске Чүпрәле авылы) киттеләр.

Булачак солдатларны озатырга район җитәкчеләре, якыннары, дуслары килгән иде. Хәрби хезмәткә чакырылучыларга җылы теләк сүзләре белән Башкарма комитет җитәкчесе Рөстәм Мөхәммәтҗанов мөрәҗәгать итте.

"Армиядә хезмәт итү-һәр ир-ат тормышында мөһим этап, мактаулы бурыч һәм батырлык мәктәбе ул. Сезгә нык сәламәтлек, рухи көч һәм хезмәтне уңышлы үтүегезне телим", - дип билгеләп үтте Рөстәм Мөхәммәтҗанов.

Егетләр Ватанны саклаучылар исемен лаеклы үтәргә вәгъдә иттеләр. Якыннары, дуслары аларга җиңел хезмәт һәм тизрәк өйләренә кайтуларын теләделәр.