Чүпрәледә "Игелекле ишегалды" проекты: гаилә кыйммәтләре, традицияләре турында әңгәмә

"Сезнең өчен гаиләдә нәрсә кыйммәтле? Гаиләдә рухи ниләр бар?» Әлеге сорауларга җавап эзләү, фикер алышу өчен «Без бергә – без булдырабыз» дип исемләнгән үзенчәлекле балалар тәрбияләүче ата-аналар клубы утырышы узды.

Чара авыр тормыш хәлендә булган балаларга ярдәм итү фондының "Игелекле ишегалды" социаль проектын тормышка ашыру кысаларында оештырылды.

Әңгәмә барышында гаилә кыйммәтләре, гореф-гадәтләр, традицияләр турында сүз барды. Чарада катнашучылар алдында Иске Кәкерле мәчете имам-хатыйбы, район мөхтәсибе урынбасары Илһам хәзрәт Шаммасов, Түбән Чәке авылы чиркәве протоиерее Олег атакай, ЗАГС бүлеге җитәкчесе Альбина Шәрәфетдинова чыгыш ясадылар.

-Балаларны гаиләдә дөрес тәрбияләү, белем, рухи кыйммәтләр, игелекле сыйфатлар, бер-береңә ярдәмчел булу, хөрмәт итү-барысы да ата-ана үрнәгендә формалаша, Ата-ана һәм бала арасында аңлашу, дустанә мөнәсәбәт булырга тиеш, -дип белдерде имам-хатыйб Илһам хәзрәт Шаммасов.

Чарада  өстәмә белем бирү педагогы Ирина Борисова баш миен, сөйләмен үстерү, игътибар, хәтер, җитезлекне арттыру  өчен күнегүләр үткәрде.

Аерым командаларга бүленеп, ата-аналар һәм балалар гаилә агачын ясадылр, иң кадерле кешеләр исемнәреннән аның яфракларын булдырдылар. Һәр команда биремнәрне уңышлы башкарып чыкты. Чара ахырында һәр гаилә үзенең гаилә агачын презентацияләде.