Ак Барслылар силос сала

"Ак Барс - Чүпрәле" агрофирмасының Татар Бизнәсе филиалында беренчеләрдән булып силос салуга керештеләр. Көн кичкә авышкан. Шуңа да карамастан азык утарында эшнең кызган чагы иде. Фуражир Рәшит Айнетдинов үзенә тапшырылган эшне җиренә җиткереп үти торган шәхес. Кайтарылган азыкларның күләме, дымлылыгы һәм сакланышы өчен җаваплылыкны да аңа йөкләгәннәр. "Монда дүрт траншея бар. Өчесе 1200 әр тонна һәм берсе - 800 тоннага исәпләнгән. Зур траншеяның берсен күпьеллык үләннәрне ваклатып сенаж салдык һәм өстен дә капладык. Күргәнегезчә, берүк вакытта силос та салабыз, аның янәшәсендәге траншеяга сенаж да тутырабыз. Яшел массаның дымлылыгы таләпләргә туры килә. "К - 700" маркалы тракторларны идарә итүче Рәшит Тимербулатов белән Евгений Данилов траншеяны тыгызлап торалар,- ди фуражир. Басудагы комбайннар артыннан да күз иярми.

"200 гектардагы люцернаның икенче катын чабуны төгәлләдек. Янәшәдәге 300 гектарлы басуда кукуруз үстергән идек, массасы яхшы чыга. Марсель Айметдинов кебек тырыш механизаторлар булганда эшләр дә көйле бара",- дип сүзгә кушыла "Ак Барс - Чүпрәле" агрофирмасының әйдәп баручы зоотехнигы Зәкиулла Усманов. - Терлек азыгына кытлык булмас, хәзер иң мөһиме тупланган азыкның сакланышын гына тәэмин итәргә кирәк,- ди белгеч.