Чүпрәледә cирена тавышлары яңгыраячак

Бу көннәрдә районда "Игътибар, тыңлагыз!", "Һава тревогасы", "Радиация тревогасы", "Химик тревога"лары бирелергә мөмкин. Сирена тавышлары яңгыраячак. Шуңа күрә дә халыкка куркып калмаска кирәк. Бу бары тик өйрәнүләр генә булачак. Шул ук вакытта тревогаларларның нинди очракларда бирелгәнлеген һәркем белеп торырга тиеш. Алай гына да түгел, өйрәнүләрне үткәрүче министрлык вәкилләре халыкның бу уңайдан ни дәрәҗәдә белемле булуы белән кызыксынырга да мөмкин. Шуңа да нинди сигналлар булачагын карап китик:

- "Игътибар барчагызга!" - "Внимание всем!" - шушы сигнал калган бар кисәтү билгеләренең башлангычы булып тора. Ул гадәттән тыш хәл килеп чыкканда халыкның игътибарын юнәлтү өчен бирелә.

- "Һава тревогасы" - "Воздушная тревога" дошманнардан куркыныч янаганда бирелә. Аны ишетүгә, радиоалгыч, телевизорларны кабызу кирәк. Алга таба нишләргә, үзеңне ничек тотарга кирәклеге турында ачык төгәл күрсәтмә нәкъ менә телевидение-радио аша бирелә. Өйдә ут-газны сүндереп, беренчел кирәк-яракларны алып, паникага бирелмичә, кушылганны үтәү кирәк.

- "Һава тревогасы тәмам" - "Отбой воздушной тревоги" - куркыныч бетүне аңлата. Аны ишеткәннән соң, комендантлар рөхсәте белән, качкан урыннан чыгып, гадәти тормыш рәвешен дәвам итәләр.

- "Радиация куркынычы" - "Радиационная тревога" - радиоактив матдәләр җыелган болыт килгән җирлектә бирелә. Бу очракта сулыш органнарын саклау чараларын күрү: респиратор, марлялы битлек, кулдан ясалган битлек, противогаз куллану зарур. Радиоактив матдәнең хәвеф дәрәҗәсенә карап, 3-4 сәгатьтән алып берничә тәүлеккә кадәр качар урын табу кирәк.

-"Химик тревога" - "Химическая тревога" -һавада агулы химик матдәләр булуы турында хәбәр итә. Аларның һавага күпме дәрәҗәдә таралуына карап, я тыштан һава кермәслек итеп ишек-тәрәзәләрне ябарга, ярыкларны томаларга, юеш битлек киеп, тәннең ачык урыннарын капларга; я махсус ышык урынга барырга кирәк. Агуланган территориядә җиргә ятарга, утырырга, аннан бер генә әйберне дә үзең белән алырга ярамый. Эвакуациядән соң бар кеше дә мәҗбүри рәвештә санитар эшкәртү үтә.

Әлбәттә, югарыда әйтелгәннәрне ишеткәч, куркыныч булып китә. Ходай үзе сакласын, болар барысы да өйрәнүләр генә булып калсын, илләребез тыныч булсын.