Армиягә чакыру комиссиясендә

Комиссияне егермедән артык егет үтте. Алар арасында элиталы частьләрдә, һава десанты гаскәрләрендә хезмәт итәргә теләүчеләр күп иде. Әмма, сайлап алу конкурсы җитди. Сәламәтлекләре нык булган егетләргә генә андый бәхет тәтеде. Чакыруда юристлар да бар иде. Билгеле инде алар үзләрен Россия Федерациясе Эчке эшләр министрлыгы гаскәрләренә җибәрүләрен сорадылар. Хәрби хезмәтттән кайткач та алар хокук саклау органнарында хезмәт итәчәкләренә ышандырдылар. Әле яңа гына урта мәктәпне тәмамлап хәрби кием кияргә тиешле егетләр арасында югары уку йортларына керергә хыялланучылар да булды. Андыйларга 1 октябрьгә кадәр үз көчләрен сынап карау мөмкинлеге бирелде.