Эсседә күпме су эчәргә кирәк?

Белгечләр эссе көннәрдә су балансын ничек сакларга кирәклеген аңлатты. Гадәттә, өлкән кешегә тәүлеккә эчелергә тиешле норма тән авырлыгына бәйле. Һәр килограмм авырлыкка якынча 30 миллилитр су туры килергә тиеш («Шәһри Казан»).

Мәсәлән, авырлыгы 60 кг булган кешегә – 1,8 литр, ә 70 кг булган кешегә 2,1 литр су эчәргә кирәк. Эссе һавада көчлерәк тирләү һәм организмнан сыеклык тизрәк югалу сәбәпле, бу күләмне якынча ярты литрга арттырырга киңәш ителә.

Шулай да тәүлеклек су күләмен берьюлы эчәргә кирәкми. Суны көн дәвамында тигез бүлеп эчү һәм һәр 20–30 минут саен берничә йотым су эчеп тору яхшырак.

Белгечләр балаларга һәм өлкән яшьтәге кешеләргә аеруча игътибар итәргә киңәш итә. Аларның сусау хисе көчсезрәк булырга мөмкин, шуңа күрә аларга суны даими тәкъдим итеп торырга кирәк.

Эчемлекләр бик салкын булмаска тиеш. Боздай салкын су кан тамырларының кинәт кысылуына китерергә мөмкин, ә бүлмә температурасындагы су организм тарафыннан җиңелрәк үзләштерелә һәм тамак өчен дә хәвефсезрәк санала.