“Чиста су” программасы нигезендә Чүпрәледә 5839 метр озынлыкта су үткәрелгән

Исегезгә төшерәбез, үткән ел шушы программа буенча районга бирелгән 10 миллион сум акчаның бер өлеше Кече Чынлы авылындагы эшләр өчен каралса, калган өлеше район үзәгендәге "Дачный" поселогында суүткәргеч төзү өчен тотылган иде. Әлеге максатчан программаны гамәлгә ашыру буенча быел да шактый гына эшләр башкарылды. Кече Чынлы авылының К.Маркс, Крупская һәм Калинин исемендәге урамнарында 3, 659 һәм Иске Чүпрәле авылының Дементьев урамында 2,180 километр озынлыкта суүткәргеч торбалар салынды. Җаваплылыгы чикләнгән "Чүпрәле -Коммуналь челтәрләре" җәмгыяте көче белән 6704,896 мең сумлык эш башкарылды. Алдагы елда да суүткәрү эшләре Иске Чүпрәле, Кече Чынлы һәм Хорновар-Шигали авылларында дәвам иттереләчәк.