Зариф Алимов батырлыгы онытылмый

Укучылар арасында герой -якташларыбызга багышлап шигырь иҗат итү, инша язу, рәсем ясау һәм шигырьләрне сәнгатьле уку буенча төрле бәйгеләр оештырылып килә. Бу бәйгеләрдә барлык укучылар да актив катнашып, төрле номинацияләрдә җиңүләр яулыйлар. Һәр елны батыр якташыбыз Зариф Алимов истәлегенә баскетбол, волейбол, чаңгы ярышлары да үткәрелеп тора. Быелгы ярышларда да укучылар бик теләп катнаштылар.

31 нче гыйнвар көнне Советлар Союзы Герое Зариф Закир улы Алимовның һәлак булуына 72 ел тулу уңаеннан искә алу сәгате үткәрелде. Алимов Зарифка багышлап 7 нче сыйныф укучысы Махмутов Айгиз "Үлемсез батыр" исемле презентация әзерләде һәм укучыларга тәкъдим итте. Айгиз үзенең эшендә Герой авылдашыбызның биографиясе һәм сугыштагы батырлыклары турында өстәмә мәгьлүматлар да китергән иде. Презентация укучыларда зур кызыксыну уятты, алар бик күп сорауларга җаваплар таптылар. Авылдашыбыз Советлар Союзы Герое Алимов Зариф Закир улын искә алу сәгате батыр һәйкәленә венок кую белән тәмамланды.