Җырлап яшә, Солтан абый!

Хәер, Солтан абый үзе дә иҗади шәхес. Яшь  вакытта кулына еш кына гармун алып, төрле чараларда катнашкан. Үзенең табигатьтән килгән сәләтенең  оныгында да чагылыш табуына ул да бик нык  сөенә. “Һәркемнең  күңеленә ятышлы һөнәре булырга тиеш”, ди ул.

Солтан абый 7 сыйныф  белем алган. Бу уңайдан: “Безне сугыш надан калдырды”, ди. Гомере буе колхозда эшләп, лаеклы ялга чыккан, хезмәт ветераны. Тормыш иптәше Рушания апа белән өч балага гомер биргәннәр.

Солтан абый үткән ел пар канатсыз калган, Рушания апа бакыйлыкка күченгән. Шуңа да аның янына Ульяновск шәһәреннән кызы Илһамиясе  күченеп кайткан. Улы да, гаиләсе белән, күршедә генә яши. Тагын бер кызы – җырчы оныгы Гүзәлнең  әнисе  Ульяновск шәһәрендә гомер кичерә.

90 яшен яңа тутырган Солтан абыйның  хәтере әйбәт, сәламәтлеге дә зарланырлык түгел. Юбилее белән котларга килгән кунакларга: район Башкарма комитеты җитәкчесе урынбасары Айрат Җәлаловка һәм авыл җирлеге башлыгы Илһам Бикчуровка җырлап та күрсәтте әле ул. Кунаклар исә Россия Президентының котлавын һәм район башлыгының бүләген тапшырдылар аңа. Җырлап яшә, Солтан абый, сәламәт бул!