Чүпрәле районы Кече Шәйморза авылында яшәүче Мөнирә Ханбикова 90 яшьлек юбилеен билгеләп үтте

Мөнирә Зәкәрия кызы 1934 елда туган һәм, Бөек Ватан сугышы белән бәйле авыр вакытларда чыныгып, үзен чын хезмәт кешесе итеп күрсәтә алган. Яшьтән үк колхозда эшли башлаган, печән чапкан, чөгендер үтәгән һ. б..

Тырышлыгы һәм эшкә бирелгәнлеге аны колхоз бригадасының алыштыргысыз хезмәткәре булуга китерә, шулай итеп ул авыл хуҗалыгын үстерүгә үз өлешен кертә. Мөнирә әтисез үсә, чөнки гаилә башлыгы сугыштан кайтмый.

1958 елда уңган кыз сугыш ветераны Ханбиков Сәгыйть Ибраһим улына кияүгә чыга һәм алар 60 елга якын бергә яшиләр, улларын тәрбияләп үстерәләр. 

Мөнирә Зәкәрия кызы «XXII партъезд ис.» колхозда эшләп, лаеклы ялга чыга. Хезмәт елларында ул намуслы хезмәте өчен күп кенә бүләкләргә һәм Мактау грамоталарына лаек була. 

Бүгенге көндә Мөнирә Зәкәрия кызы улы Инсаф тәрбиясендә яши. 

Мөнирә Ханбикованы юбилее белән котларга Чүпрәле районы башлыгы урынбасары Алексей Ярухин, Иске Шәйморза авыл җирлеге башлыгы Илһамия Мөхитова, шулай ук туганнары һәм күршеләре килде. Алар аны чын күңелдән котладылар һәм нык сәламәтлек теләделәр.