Сугыш башланганда Зәйтүнә апа Хафизовага 12 яшь була

Әмма ул еллардагы Рәсәй ул-кызларының балалык, үсмерчагын сугыш "йота". Зәйтүнәгә дә бик яшьли колхоз эшенә, утауларга йөрергә, ачлык-ялангачлыкны сизәргә туры килә. Язмышын ул, соңрак, сугыштан кайткан солдат Гали Гыйззәтуллин белән бәйли. Алар 53 ел, иңгә-иң куеп, ил-көн өчен хезмәт итәләр. Биш бала тәрбияләп үстерәләр. Зәйтүнә ханым исә 45 ел гомерен мөгаллимлеккә багышлый. Ул бүген дә акъәби булып, төпле киңәшләрен биреп, мәҗлесләрдә Коръәннән сүрәләр укып, яшь буынны әдәпле-әхлаклы итүгә үз өлешен кертә. Әйе, гаепсездән михнәт күргәннәр, ил данын иңнәре белән күтәргәннәргә хөрмәт халык күңелендә яши һәм яшәр!