23 февраль- Ватанны саклаучылар көне уңаеннан Чуваш Бизнәсе авылы мәктәбенең спорт залында бадминтон буенча VIP - турнир уздырылды. Ул көнне утызлап җитәкче үзенең спортка булган сәләтен күрсәтте.
Ярышларга районның оешма, предприятие җитәкчеләре һәм җирле үзидарә башлыклары килде. Бадминтон буенча федерация филиалы җитәкчесе Сингх Раджеш Кумарның әйтүенә караганда, районда әлеге спорт белән шөгыльләнүчеләрнең саны арта бара. Ир- егетләр арасында Ватанны саклаучылар көне уңаеннан мондый чара үткәрү дә тикмәгә түгел, алар һәрчак сәламәт, акыллы яшәү рәвеше алып барырга тиешләр. Моны исбатлап, район башлыгы Александр Шадриков шәхсән үзе үрнәк күрсәтте. Ул ярышларга килүче барлык җитәкчеләрне, җанатарларны һәм тамашачыларны ихлас күңелдән бәйрәм белән котлады, тормышларында һәм эшләрендә уңышлар, гаиләләрендә иминлек һәм бәхет теләде. "Районда бадминтонның популярлашуы һәм аның белән шөгыльләнүчеләрнең арта баруы куаныч тудыра. Мондый турнирлар үткәрүне алга табан да дәвам итәргә кирәк. Ә федерация филиалы җитәкчесе Сингх Раджеш Кумарга олы рәхмәтемне җиткерәм",- диде Александр Валерьевич. Барлык нәтиҗәләр буенча җиңүчеләр дә ачыкланды. Оешма һәм предприятие җитәкчеләре арасында Валерий Художитковка тиңнәр булмады. Икенче урынны Рамил Ахметов яулады, өченче урынга Евгений Иванцов лаек булды. Авыл җирлекләре башлыклары арасында да ярышлар киеренке узды. Барлык көндәшләрен отып район башлыгы Александр Шадриков беренче урынга чыкты. Икенче һәм өченче урыннарны Владислав Ранцев белән Алексей Храмов бүлеште. Җиңүчеләр Грамоталар һәм федерация кубоклары белән бүләкләнделәр. Ул көнне зал көн буе гөрләп торды, җыр- музыка яңгырады, сәүдә эшләде, бәйрәмчә табын да әзерләнгән иде. Чебоксар шәһәреннән килгән Кристина Яковлеваның һинд бию залдагыларга бигрәк тә ошады, аны көчле кул алкышларына күмделәр.
Иң мөһим һәм кызыклы язмаларны Татмедиа Telegram-каналында укыгыз
