Искезадурлылар "Орчык" бәйрәменә җыелды

Иске Задур авыл клубында шуларның берсе - "Орчык бәйрәме" үткәрелде. Ул кара көз җитеп, җиргә кар төшкәч уздырылган. Хуҗа кеше күп итеп сарык йоны әзерләп куйган, өмә буласы көнне мич ашлары, бәлешләр, гөбәдияләр пешергән.

Өмәгә күрше-күлән, дус-ишләр чакырылган. Бергәләп күмәк эш башкарганнар: кемдер йон теткән, кемдер өрләгән, кемдер йомгакка чорнаган, кемдер бәйләгән. Әбиләре, әниләре белән килгән балалар да буш тормаган: малайлар орчык ясау һөнәрен үзләштергәннәр, ә кыз-балалар өлкәннәрдән кул эшләренә өйрәнгәннәр. Ә инде эшләргә күңелсез булмасын өчен, болар барысы да уен-көлке, җыр-бию белән үрелеп барган. Эш тәмамлангач, хуҗа эшчеләрне тәмле ризыклар белән сыйлаган.