Татарстанда балалар катнашындагы юл-транспорт һәлакәтләре саны арткан

2025 елның беренче алты аенда республикада балигъ булмаганнар катнашында 211 юл-транспорт һәлакәте теркәлгән, аларда 6 бала һәлак булган, 227се төрле дәрәҗәдәге җәрәхәтләр алган. Бу турыда ТР «Юл хәрәкәте иминлеге» дәүләт бюджет учреждениесе пресс-службасы хәбәр итә.

Юл-транспорт һәлакәтләренең яртысы диярлек җәяүле балалар белән бәйле. Килеп чыккан һәлакәтләрнең 20 процент очрагы балаларның үзләренең саксызлыгы аркасында: аларның юлга йөгереп чыгуы, як-якларына карамый яки светофорның тыю сигналында юл аша чыгуы нәтиҗәсе.

Шуңа да ата-аналарны һәм машина йөртүчеләрне уяу булырга чакырабыз, шулай ук, балаларны юлда куркынычсыз тәртип кагыйдәләренә өйрәтүнең мөһимлеген искә төшерәбез.

Татарстанда, шул исәптән безнең районда да 14 июльдән 24 июльгә кадәр «Бала — төп пассажир!» акциясе узды.

Агымдагы елда республикада пассажир балалар катнашында 69 юл-транспорт һәлакәте теркәлгән, аларда 5 бала үлгән, 8-е җәрәхәтләнгән. 

Балаларны йөртү кагыйдәләрен бозган 9 юл-транспорт һәлакәте теркәлгән, аларда 1 бала һәлак булган, 13е яраланган.

Транспорт чарасында балаларны утыртып йөрткәндә һәр әти-әни һәм шофер белергә тиешле кагыйдәләрне дә искә төшерәсебез килә:

— 12 яшькә кадәр баланы алгы утыргычта бары тик балаларны тотып тору җайланмасында (детское удерживающее устройство) гына йөртергә кирәк. 

— 7 яшькә кадәр бала арткы утыргычта, шулай ук балалар креслосында гына йөрергә тиеш. 

— 12 яшьтән өлкәнрәк бала исә транспорт чарасында куркынычсызлык каешын эләктерергә тиеш.

Балалар креслосы яисә баланы тотып тору җайланмалары юл-транспорт һәлакәтләре вакытында үлем куркынычын 70 процентка кадәр киметә.

Әлеге төр кагыйдәләрне үтәмәгән өчен закон тарафыннан җәза да каралган, штраф суммасы 3000 сумны тәшкил итә (РФ КоАП 12.23 маддәсенең 3 өлеше).