Чүпрәле кырларында иген шавы

Соңгы көннәрдә яуган яңгырлар урак эшләренә шактый ук тоткарлык ясады. Җайлы гына башланган урып- җыюның туктап калуы күбесе механизаторлар күңелен борчуга да салды, әлбәттә. Берничә көн эчендә генә дә комбайнчылар 2600 гектардан артык мәйдандагы ашлыкны суктырып алырга өлгерде. "Цильна" , "ТрансПорт" һәм "Шәйморза" җәмгыятьләре, "Ак Барс Чүпрәле" агрофирмасының Городище, Яңа Чокалы һәм Иске Кәкерле филиаллары, "Мәхмутов И." күмәк фермер хуҗалыгы уракның беренче көннәреннән үк яхшы старт алдылар. Әлегә район буенча суктырылган 76000 центнердан артык ашлык алар хисабында. Һәр гектардан уртача уңыш 30 центнер чамасы чыга. "Җ. Гафуров" фермер хуҗалыгында ул күрсәткеч 50 центнерны тәшкил итә. "Цильна" һәм "Шәйморза" җәмгыятьләрендә дә һәр гектардан уртача 35 центнердан артыграк ашлык суктыралар. Кече Чынлы игенчеләре 63 гектардагы борчакны теземнәргә салдылар. Комбайнчылар арасында да ярыш киң колач алды, беренче мең центнер бөртек суктыручылар да ачыкланды. "Ак Барс Чүпрәле" агрофирмасының тәҗрибәле игенчесе Валерий Храмов "Нью- Холланд" комбайны белән 3700 центнердан артык ашлык суктырып ындыр табагына озатты.

Аның хезмәттәшләре Петр Архипов, Александр Юркин, Фәрит Яфизов һәм Владимир Квасов та өч мең чиген уздылар. "Шәйморза" хуҗалыгында "ДОН- 1500" маркалы комбайнны идарә итүче Рифкать Хәлиуллин, "Акрос" комбайны механизаторы ("Ак Барс Чүпрәле" агрофирмасы) Петр Маняков, "Клаас- Мега" кыр корабы белән эшләүче Илгиз Миначев ("Цильна" җәмгыяте), "Тукано" маркалы комбайннарда хезмәт куючы Рәфик Шәйдуллов белән Илдус Җәмдиханов ("Цильна" игенчеләре) алдынгы урыннарда баралар. Һәр уракның үз үзенчәлекләре була. Нинди генә кыенлыкларга да карамастан, механизатор аларны җиңеп чыгу өчен үзендә көч һәм түземлелек тупларга тиеш. Әлбәттә, өлкәнрәк яшьтәге тәҗрибәле игенчеләр теләсә нинди авырлыкларга да чыдамрак булалар. Мондый чакта аларның яшьләргә акыллы киңәше һәм практик ярдәме бик мөһим. -Икмәк язмышы хәл ителгәндә бөтен мөмкинлекләр эшкә җигелергә тиеш.

Комбайннарыбыз начар түгел, моңа без кырга чыгар алдыннан үткәрелгән тикшерүләрдә тагын бер кат инандык. Урып- җыю эшләрен кыска гына вакыт эчендә башкарып чыгу - хуҗалык җитәкчеләре, белгечләре, механизаторлары һәм әлеге кампаниедә катнашучы барлык хезмәтчәннәрдән зур оешканлык сорый. Хуҗалыкларга узган елларда сынап каралган эш тәҗрибәсен быел да куллану комачау итмәстер. Комбайнчылар эшен мөмкин кадәр нәтиҗәлерәк итәр өчен барлык мөмкинлекләрне тулырак итеп файдаланырга кирәк. Монда матди кызыксындыру чаралары, эшне ике сменалы итеп оештыру, үзара ярдәм¬ләшүне күздә тотып әйтүем",- ди агро идарә начальнигы Ирек Мөхәммәтҗанов