Чүпрәленең Заводская урамында яшәүчеләр Сабантуй үткәргәннәр

-Урамыбыз барлыкка килгәнгә быел 20 ел тулды. 1993 елда килеп урнашкан 15 йорт бүген дә шушы килеш-дусларча, туганнарча яшибез. Урамыбызда яшәүчеләрнең 50 проценты чуваш милләтеннән.

Күбебезнең балалары үсеп читкә китте. Быел бергә, бер урамда яши башлавыбызның юбилеен Сабантуй белән билгеләп үтәргә булдык. Мондый тәкъдимне барыбыз да хуплады һәм һәр йорттан 500 әр сум акча кушылып бәйрәм үткәрдек,- дип шатланып сөйли район үзәгендәге "Заводская" урамында яшәүче Рөстәм Хамидуллин.

Урамдашлар бәйрәм программасын да бергәләп төзиләр. Спорт ярышлары үткәрәләр, концерт номерлары әзерлиләр. Аркан тартуда Гүзәлия Гайнетдинова, йомырка куйган кашыкны авызга кабып йөгерүдә Ольга Николаева, кул көрәштерүдә Ленар Гайнетдинов, гер күтәрүдә 70 яшьлек Хәмзә Салихов, аякларга капчык киеп йөгерүдә Резедә һәм Рафаил Җәббаровлар, күзне бәйләгән килеш уенчыклар кисүдә Резедә Камалова һәм чүлмәк ватуда аның тормыш иптәше Фиркатька тиңнәр булмаган. Барлык уеннарга да Анатолий Чернов хөкемдарлык иткән. Әлбәттә инде, җиңүчеләргә призлар да бирелгән. Тәлгать Халитов сыздырган гармунга кушылып җыр-биюләр башкарылган. Төшке аш вакытында башланган урам Сабантуе кичке караңгыга кадәр уен-көлкеләр белән дәвам иткән. Тату күршеләр шашлык кыздырганнар, уха пешергәннәр, биш самавыр чәй эчкәннәр.