Машинаң кышка әзерме?

Гадәттә, ноябрь аенда беренче каты салкыннар күзәтелә башлый. Ә аз гына суыту белән үк юл өстен юка боз каплый, мондый шартларда руль белән идарә итүгә машина йөртүчеләрнең күбесе тиз генә күнегеп китә алмый. "Карлы-бозлы юл барыбыздан да игътибарлылык, саклык, профессиональ осталык таләп итә. Бу машина йөртүчеләргә генә түгел, җәяүлеләргә дә кагыла. Чөнки машина юлын кисеп үткәндә, яисә транспорт узачак юл буеннан атлаганда кинәт егылып, тәгәрмәч астына эләгү ихтималы бик зур. Һава торышы шартлары үзгәрү сәбәпле, район автоинспекциясе транспорт белән идарә итүчеләргә мөрәҗәгать итеп, хәрәкәт тизлеген юлларда иминлек сакланырлык итеп сайларга, аеруча игътибарлы булырга һәм көндез дә транспорт фараларының яктылыгы якын арага төшә торганын кабызып йөрергә онытмаска, шиналарны кышкыларына алмаштырырга өнди. Иң мөһиме, бер-берегезгә игътибарлы булырга кирәк",-ди автоинспекциянең пропаганда буенча инспекторы, полиция өлкән лейтенанты Айрат Хуҗиев.