Хәзер район аграрчылары өчен иң җаваплы чор. Язның бер көне ел туйдыра, дип халык юкка әйтмәгән. Моны игенчеләр үзләре дә аңлый.
Бүгенге көндә район буенча 2800 гектар мәйдандагы күпьеллык үләннәр һәм 6135 гектар мәйдандагы уҗымнар өстәмә тукландырылган. Шул ук вакытта "Цильна" җәмгыяте, "Низамов", "Мәхмүтов" крестьян-фермер хуҗалыкларында күпьеллык үләннәрне тырмалауга керештеләр. "Цильна" җәмгыятендә әлеге эш-200 гектар, "Низамов"та -100 гектар, "Мәхмүтов"та 50 гектар мәйданда башкарылган.
-Агымдагы елда яз иртә килсә дә, озакка сузылды. Көннәр әле дә булса тулысынча җылынып бетә алганы юк. Дөрес, салкынча һава күпьеллык үләннәрне һәм уҗымнарны өстәмә тукландыруда уңай шартлар тудырды, әмма соңгы көннәрдәге яңгырлар бу эшне бераз тоткарлады. Шуңа да аяз көннәрдән файдаланып, эшне тизләтү таләп ителә,-ди район авыл хуҗалыгы һәм азык-төлек идарәсенең баш агрономы Виктор Митрошкин.
Шулай ук, район җәмгыятьләрендә һәм агрофирма филиалларында орлыкларны инкрустацияләү эшләре дә башланган. "Цильна" җәмгыятендә 400 тонна орлык әзерләп тә куелган инде.
Һава торышы җылынып, басу-кырлар әзер булуга авыл хуҗалыгы хезмәтчәннәре өчен шактый кызу эш чоры башланачак. Кыр эшләренең ни дәрәҗәдә сыйфатлы булачагы исә техниканың төзеклегенә бәйле.
"Цильна" җәмгыятендә язгы кыр эшләрендә катнашачак техника күптән әзер инде. Алай гына да түгел, биредә чәчүдә катнашачак техника көздән үк әзерләнә башлаган. Тракторларның, машиналарның һәр часте, детале үз эшләрен төгәл белүче механизаторлар тарафыннан көйләнеп, төзекләндерелеп куелган. Төзекләндерү мастерскойларында көздән алып язгача эш тукталмаган. Нәтиҗәсе дә күз алдында. Уҗымнарны һәм күпьеллык үләннәрне тукландыруга да алар район хуҗалыклары арасында беренчеләрдән булып керештеләр. Чәчүдә дә сынатырга исәпләре юк.
-Быелгы чәчүдә "Агромастер" чәчү агрегаты белән югары җитештерүчән "Нью-Холланд", өч "Т-150", биш "МТЗ-1221", чит ил агрегаты "Монопил" белән бер "Агротрон" (шикәр чөгендере чәчәчәк), дүрт "ДТ-75", өч "Т-70" һәм унбишләгән тәгәрмәчле тракторлар катнашачак. Тракторларның һәм агрегатларның һәркайсы әзерлек сызыгына куелган, комплектлаштырылган, бүгеннән кырга чыгарга әзерләр,-ди җәмгыять директоры урынбасары Фәргать Хәйруллов.
Җәмгыятьтә чәчү чорында эш ике сменалы булачак. Шуңа да һәр техникага ике механизатор беркетелгән. Айрат Яфизов һәм Рәфикъ Шәйдуллов җәмгыятьтә ел әйләнәсе хезмәттә. Быелгы язгы чәчүдә дә "Нью-Холланд" тракторы белән катнашачаклар. Үзләре идарә итәчәк техниканы да үзләре төзекләндергәннәр.
Иң мөһим һәм кызыклы язмаларны Татмедиа Telegram-каналында укыгыз
