Туган Як
  • Рус Тат
  • Эшли белсәң, отышлы

    Терлекләрне кышлату мәсьәләләренә багышланган семинарның чираттагысы 15 декабрь көнне "Ак Барс-Чүпрәле" агрофирмасының Шланга һәм Матак филиалларында үтте. Семинарда авыл хуҗалыгы һәм азык-төлек идарәсе, җәмгыятьләр, агрофирма филиаллары җитәкчеләре, белгечләре катнашты.

    Семинарда катнашучылар башлап Шланга филиалының товарлыклы-сөтчелек фермасында булдылар. Семинар эшен Шланга филиалында башлауның төп максаты-биредә савым сыерларның санитария шартларына һәм нормаларына туры китерелеп асралуны башкаларга да үрнәк буларак күрсәтү иде. Әйтергә кирәк, биредә сыер савучылар өчен дә, маллар өчен дә барлык уңай шартлар да тудырылган. Савым сыерлар, араннар чиста, каралган. Малларның асларына тиешле күләмдә салам түшәлгән. Шулай ук, ферма биналары янындагы кардаларга кыш буена җитәрлек күләмдә салам кайтарылып куелган. Димәк, кышның салкыннарында һәм бураннарында салам эзләп кырга чыгасы түгел, малларның аслыклары да һәрвакыт чиста торачак. Малларның астында тиешле күләмдә салам түшәлгән булуы-ул гигиена таләпләренә дә җавап бирү дигән сүз. Бу иң беренче чиратта, сыерлардагы мастит авыруын профилактикалауда. Аннан соң мастит авыруының сөт җитештерү күләмен 25-30 процентка киметүен дә истән чыгармаска кирәк. Фермаларда гигиена таләпләрен үтәү исә сөтнең күләмен генә түгел, аның сыйфатын да арттыра. Бүгенге көндә Шланга филиалында тәүлегенә бер сыерга уртача 19 кг. сөт җитештерү моның ачык мисалы булып тора. Биредә, әлбәттә, филиал җитәкчесенең эшне дөрес оештыруы да зур роль уйный.

    Семинарның икенче өлеше Матак филиалында дәвам итте. Биредә семинарда катнашучылар игътибарына малларны бәйләмичә асрау алымы тәкъдим ителде. Соңгы елларда республиканың Балтач, Арча кебек күп кенә районнарында малларны әлеге алым нигезендә асрый башлаганнар. Аның өстенлеге шунда, маллар табигый шартларга яраклаштырылып асрала. Биредә араннар чиста, малларның аслыкларына калын итеп салам түшәлгән. Араннарның ишекләре ачык килеш тора, кардаларда печән, сенаж кебек азыклар салу өчен утлыклар ясалган, эчү өчен һәрдаим җылы су килеп тора. Биредә 120 баш тана асрала, аларга ике кеше хезмәт күрсәтә. Ике айга бер тапкыр бульдозер белән араннар чистартылып, аслыклары яңартылып тора. Малларның өсләре чиста. Мунчәли филиалында да әлеге алым нигезендә эшлиләр. Белгечләр фикеренчә, аз чыгым тотылучы, икътисадый яктан отышлы алым. Аннан соң семинарда катнашучылар игътибарына иске абзарларның берсен төзекләндереп һәм үзгәртеп ясалган ат абзары тәкъдим ителде. Биредә, шулай ук, атларны асрау өчен барлык шартлар да тудырылган. Башка җәмгыятьләр белгечләренә һәм җитәкчеләренә үрнәк итеп алырлык әйберләр күп.

    Нравится
    Поделиться:
    Реклама
    Комментарии (0)
    Осталось символов: