Чүпрәледә терлекләрне кышлату чоры дәвам итә

15 ноябрь көнне "Ак Барс-Чүпрәле" агрофирмасының Яңа Кәкерле филиалында үткән семинарда да әлеге мәсьәләләр күтәрелде.

Үткән елгы кышлату чорында Яңа Кәкерле филиалында үткән семинарларның берсендә катнашырга туры килгән иде. Әйтергә кирәк, бүген биредә уңай якка үзгәрешләр күзгә ташлана. Сыйфатлы печән малларның алдында тора, азыкны пешереп, тәмләндереп, төрләндереп, витаминнар белән баетып бирергә тырышалар. Биналар төзек, чиста, бөтен җирдә тәртип. Нәтиҗәсе дә күз алдында, соңгы ун көнлектә филиалда сөт җитештерү күләмен 400 кг.га арттыра алганнар. Филиалның потенциалы бар, башкарасы эшләр дә шактый әле.

Семинарда катнашучылар игътибарына биредә яшь бозауларны тәрбияләү, каплатылган таналарны тәрбияләү бүлекләре, азыкны пешереп әзерләү цехлары тәкъдим ителде. Аннан биредә тагын бер яңалыкны ассызыклыйсым килә. Яшь бозауларга җәй айларында әзерләнгән дару үләннәреннән төнәтмә ясап эчерәләр. Гади генә нәрсә кебек, әмма әлеге ысул яшь үрчемнең сакланышына уңай тәэсир итә, диделәр терлекчелек белгечләре.

Семинарда, шулай ук, сыерларны үзвакытында каплату (20 мартка кадәр каплатылган сыердан гына ел тәмамланганчы бозау алырга мөмкин), таналарны каплатуга әзерләү, аларны тиешле рацион буенча ашату, буаз таналарны бозаулаганчы алдан ук саварга өйрәтү, массаж ясау, кышкы чорда малларда авитаминоз булмасын өчен аларның рационына витаминлы препаратлар, витаминга, бигрәк тә каротинга бай азыклар кертү кирәклеге мәсьәләләре дә күтәрелде.